Daily Newspaper

MLA-in hrileng do danah sawrkar zawhna zawt

41

Covid-19 leng mekin kiam lam a pan theih loh avangin he hri do hneh tura Mizoram sawrkar hmalak dan chak tawk lo nia a hriat laite chu MLA Dr BD Chakma chuan zawtin, chhang ngei turin sawrkar a phut tih a sawi.

BJP Mizoram vice president ni bawk Dr BD Chakma chuan, Mizorama sawrkarna chelhtu MNF party chuan khauh taka mipui pawn chhuah khapna (total lockdown) a kalpui nasat hle tawh thu leh khawvel puma lockdown rei ber tih hial chi a nih tawh thu te, tum tam tak lockdown a ni tawh chungin hri kai zat erawhin kiam lam a pan si loh thu te a sawi a. Sawrkar chu zawhna hrang hrang zawtin – mipui harsatna sukiang turin hrileng thunun dan dang a hre ngang lo em ni, tih te; Covid hri kai tih tlemna tur zawngin damdawi leh hmanruate a ngaihthah viau em, tih te; engatinge Covid kai damlote tan kawng thui tak zawh ngaia Dedicated Covid Care Centre chu ZMC Falkawn ami chauh a rin reng tihte zawtin, ‘Hmun kilkhawr zawk atanga kilometer za chuang kal ngai ZMC panna lamah hian damloten nunna an chan hman hial thei dawn,’ a ti.

Mizoram sawrkar chu Siaha, Lunglei, Champhai leh Kolasib ah te tal medical oxygen siamna tun thlenga a din loh chhan te; Siaha, Lunglei, Champhai leh Kolasibah te tal eng vanga RT-PCR khawl la bun lo nge a nih, tih te; Siaha, Lunglei, Champhai leh Kolasib-ah tal Covid Care Centre dang a siam loh chhan te; mipui vantlang enfiahna (mass testing) kalpui that duh loh chhan te; SEDP atana cheng vaibelchhe 450 zet kum 2021-2022 chhung atana dah chu tunah khaw nge a awm, tih te Mizoram sawrkar hi a zawt a. Mi hausa leh rethei, Mizoram mipuiten khawvela lockdown rei ber hnuaiah eng chen nge an tawrh la ngai dawn, tiin, Covid avanga harsatna namen lo thleng mek chu Mizoram sawrkar hlawhchham zia lanna a ni mai em, tih te chu chhang ngei turin a phut tih Tuichawng bialtu MLA hian a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy