Daily Newspaper

MLA-in Press Club tan thuthleng pe

12

MLA Pu Lalrindika Ralte chuan a nu hriatrengna atan Aizawl Press Club-a dah turin thutthleng (steel chair) 50 Mizoram Journalists’ Association a hlan.

Hemi puala nimina Aizawl Press Club-a hun hmanah Hachhek bialtu MLA Pu Lalrindika Ralte chuan MJA member-te chu mahni hrehawm pawisa loa hmingthatna leh chawimawina um loa thudik, belhchian dawl leh chanchin thar, mipui tana chhawpchhuaktu an nih avangin a nu Hrangthanmawii hriatreng nan he thil hi tih makmawhah a ngai tih a sawi a. “Kan nu leh pate hi Pathian min pekte an ni a, an ni tluka hlu hi he khawvelah thildang kan nei lo tih hi Mizo thalai, thangthar zawkte hian kan hriat thar leh a ngai a ni,” a ti.

Kan tui emaw tui lo emaw kan duh emaw duh lo emaw democracy-ah chuan politics atanga talhrang thei tumah kan awm lo, tiin, politician-te chu ram leh mipui tana inpe an nih avangin politician-te dinhmun chu a ropui hle tih MLA Pu Lalrindika Ralte hian a sawi a. Politics hi chutiang khawpa pawimawh a nih avang chuan politician-te pawhin kan zir a ngai takzet tih sawiin, “Ram leh hnam hmasawnna ngaihtuah leh mipui rawngbawl a, mipui welfare ngaihtuah hi kan tih tur a ni. Politics nihna dik leh hlutna hrechiang loa party politics chauh ngaihtuah a, ruihchilh a, rilru zim tak pu thinte hian politics hmai an ti bal thin,” a ti a. Mipui rorelna kawnga direct-a mawhphurhna neitu politician-te chu an mawhphurhna ropui tak hlen chhuak turin ke an pen tur a ni, tiin a sawi bawk.

MJA president Pu Zonunsanga Khiangte pawhin thu sawiin, MLA Pu Lalrindika Ralte thilphalna azarah MJA-in rotling thilpek an dawng chu vannei an intih thu a sawi a. Tuna Aizawl Press Club-a an thuthleng tam zawk chu kum 2006-a Hindustan Petroleum Corporation Limited-in an CSR Fund atanga an pek a nih thu leh thlak a hun viau tawh laiin, MJA hmangaihtu an tawng fuh ta hlauh chu amah Pu Lalrindika Ralte leh a chhungte chungah an lawmin, an hming chu MJA-in a lam chhuak fo tawh dawn tih a sawi a, MJA thiantha ni reng turin a sawm tih a sawi bawk.

Thuthleng thar inhlanna hun hi MJA treasurer Pu C Lalhmachhuana’n a kaihruai a, MLA Pu Lalrindika Ralte chhungte leh MJA member-te he hunah hian an tel a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy