Daily Newspaper

MLA pakhat a +ve, MLA dang pathum chenpuite pawh, MLA dang enfiah dawn

27

Aizawl, September 12 :  Covid-19 natnain Mizoram a luh chilh mek a, MLA-ah pawh he natna vei an awm tawh. September ni 13-a result hriatah Tuichawng bialtu Dr BD Chakma chu Covid-19 natna vei hriatchhuah thar zingah a tel.

Dr BD Chakma a positive tih hriat a nih bakah minister pakhat chu ina a chenpui a positive tih hriatchhuah a ni a, MLA pahnihte pawh an chenpuite an positive tih hriatchhuah a ni.

Rorel khawla thute leh an chenpuite’n hri an kai tak avang hian assembly speaker chuan MLA-te an him em tih hriat nan an vaia enfiah an ni dawn tih a sawi.

Dr BD Chakma hian hri hi khawi atanga a kai nge a hriat loh thu leh rin dan pawh a neih thiam loh thu a sawi a, “Mak ka ti khawp mai a,” tiin, “Contact pawh ka nei lo a,” a ti.

September ni 10 khan Assembly secretariat-a dak semtu pakhat chu a positive tih hriatchhuah a ni a, August ni 31, September ni 1,2,3 leh ni 8 tea lehkha a pek, speaker, minister pahnih leh MLA 12-te chu an sample endik niin, Dr BD Chakma hi a lo positive a ni.

Dr BD Chakma chuan dak semtu nen hian an intawk lo tih a sawi a, a nupuiin lehkha pawh a lo dawng a, an sanitize bawk tih te, a lehkha lo dawngtu a nupui leh ina a chenpuite an negative hlauh tih te a sawi.

Amah leh ina a chenpuite sample endik a nih thu leh mi dang an negative vek thu te sawiin, dak semtu hnen atanga lehkha lo dawngtu a negative laia amah zawk a positive si avangin dak semtu atanga kai a nih a rin loh thu The Aizawl Post a hrilh.

A chhuah ngai loh thu a sawi a, September ni 3 hnuah mi dang nen an in-contact lo tluk a nih tih sawiin, a fapa nen white board an lei a, dawrnghaktu hnen atanga thil a lak thu leh a kut a sanitize nghal thu te, chumi hnuah an inah a bial Damdep mi pahnih an len thu te, chu chu mi dang nena an in-contact chu a nih mai thu te a sawi.

Medical doctor a ni a, Covid-19 chungchang hi a lo chhiar ve thin thu leh theihtawpa a fimkhur thu te a sawi a, chuti chunga a positive chu, a kaina a hriat theih rih loh thu te Dr BD Chakma chuan a sawi.

Chawlhni khan ZMC-a luh tura tih a ni a, hrehawm a tih loh thu leh a symptom amahah a awm loh thu te, a dam thuai a beisei thu te a sawi.

Dak semtu lehkha pekte enfiahna result-ah minister pakhat chu a fapain Covid-19 natna a vei tih hriat a ni a, MLA dang pahnihte pawh ina an chenpuite’n an lo kai tih hriat a ni. An pathum hian Covid-19 natna lanchhuahna natna an nei lo vek tih thu dawn a ni.

MLA pakhat leh minister leh MLA pahnihte chenpuite’n hri an kai tih hriatchhuah a nih avang hian speaker Lalrinliana Sailo chuan house member-te enfiah vek ni se tiin a rawt a, health minister Dr R Lalthangliana leh medical operational team on Covid-19 team leader Dr ZR Thiamsanga te biain ruahmanna an siam.

“Kan MLA-te an him em tih hi enfiah a ngaiin kan hria a, mipui nena inhnaih tak takte kan nih avangin hei hi a ngai kan ti a,” tiin Rina Sailo chuan The Aizawl Post a hrilh a, Thawhlehni-ah sample hi lak tum a nih thu sawiin, enfiah ngai inti lo an awm chuan an thu a nih tur thu a sawi bawk.

“Kan MLA pakhat chuan hri a kai tawh a, mi dangin an lo kai ve ang tih a hlauhawm a. An chhungte nen vek endik ni se thain kan hria a,” a ti a, Dr BD Chakma-in hri a kai chu pawi a tih thu leh a dam leh thuai a beisei thu a sawi bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy