Dampa bialtu MLA a nih laia chatuan ram pan ta Lalrintluanga Sailo hmun ruak kalsan luah tura by election neih tumah ZPM party chu MLA kal ta ralna atan hmang turin an ngen tih Congress Thalai chuan an sawi.
Congress Thalai Hqrs. thuchhuak chuan, Mizoramah MLA by election vawi engemawzat neih a lo ni tawh a. Thihna avanga inthlan that a nih tum phei chuan eng party mahin inthlan buaipuitu lamin inthlan that tur thuchhuah an neih hmain candidate an puang ngai lo tih a sawi.
Kum 2021-a Tuirial bialtu MLA Pu Andrew H. Thangliana a boral tum pawhhin Election lamin inthlan that a nih tur thu a puan hmain eng party mahin candidate an puang loa. Hei hi MLA-te zahawmna leh bial mipui tawrhpuina zahawm takah a ngai tih a sawi a ni.
‘Pu Andrew H Thangliana boral avanga inthlan that a nih dawn khan ZPM leader leh tuna chief minister Pu Lalduhoma hian hetianga bialtu MLA an boral hian, ralna atan party dang pawhin candidate an siam ngai loh thu a sawi a. Tunah Dampa bialtu Pu Lalrintluanga Sailo hi ZPM hian ralna tlingah an ngai lo nge, Election atanga inthlan that a nih tur thu chhuah pawh a awm hmaa ZPM candidate an puang hi kan dem a, mihring inzah lohna lian takah kan ngai,’ a ti.
Hei bakah hian Pu Lalrintluanga Sailo boral sarhû laia ZPM party-in boruak siama programme hrang hrang an buatsaih leh Assembly House-a amah sunna (Obituary) em pawh hman hmaa candidate an puang chu dem leh mak tih a hlawh hle, tiin, ‘Hetiang inthlan that tur a nih thu sawrkar thuneituten an chhuah hmaa candidate an puang hi ZPM party-in pawisak an neih loh zia leh midang an zah loh zia an nemnghetah kan ngai a ni,’ Congress Thalai chuan a ti.
ZPM party-in an candidate atana an puan tak Pu Vanlalsailova’n inthlan senso phuhruk ngei a tum thu a sawi pawh Dampa bial mipui tan thil hlauhawm leh mahni inhaivur tumna, bial tana MLA innghah ngamna tlakah Congress Thalai chuan a ngai lo a. Hetiang politics tha lo leh hlauhawm hi Mizoram mipui leh Dampa bial mipuiin hnawl turin an ngen tih a sawi a ni.
MLA ralna atan by election hmang turin ZPM kan ngen – Congress Thalai
