Daily Newspaper

MLA Vrs PARTY PRESIDENT

16

-Ramherliana, Mi naran

Zoram politics hun hmasa lam leh vawiin hun thlenga bihchian hian Party Presidentte hi sorkarna chang an nih chuan Chief Minister an ni deuh zel a tih theih awm e. Ram thenkhatah leh India ram chhungah ngeiah erawh thung chuan alo ni vek lem lo tih erawh kan hre thei awm e. Kum 2004 chhoa Central India sorkar-a pawl hrang hrang 14 aia tam inzawmkhawm UPA (United Progressive Alliance) in thuneihna an chan lai khan Congress kha party lian ber an nih bakah hruaitu chan chang ber an nih kha. UPA ah chuan Congress President Sonia Gandhi chu Leader ber a ni a, inthlanpuiah hnehna an chan chuan Indian Prime Minister tur atan Sonia pawh chu tinzawn ber a niin thenkhatte phei chuan an nawr viau bawk nghe nghe a. Nimahsela rin loh leh beisei loh takin Manmohan Singh chu Prime Minister alo ni ta zawk a ni. The Accidental Prime Minister tih lehkhabu chhiar tawh chuan chiang takin in hre ngei ang a, mi zawng zawngin Prime Minister atan Sonia Gandhi ni tura kan ngaih vek laiin Manmohan Singh a rawn ni ta daih zawk a nih kha.

Chutianga UPA-in sorkarna an chang a, kum 10 chhung thuneihna an chan lai chuan Sonia Gandhi chu Party President a nih bakah UPA chairperson a ni char char a, sorkar-ah member of Parliament (MP) satliah angin awm mahsela Prime Minister hiat tur ber niin a kawh kualna lam apiangah Manmohan Singh chu a kal duan duan a nih ber kha. Tun huna han thlir kir leh pawhin khatih laia India sorkar kha Sonia thu thuin a kal a tih theih ang. Heta tang ringawt pawh hian Party President thuneihna chu a lang fiah mai awm e. MNF tan hian an President Zoramthanga tawng zawng zawng hi MNF Party aiawha sawi ti ila a dik theihna a awm rualin lungawih chiah lo erawh a core team zingah ngei pawh an lo awm palh thei. Heng Aizawl khawpui chhunga Kawngchhawng siam tum chungchangte, Airport Cute ber siam tur te, Nuaih thum sem te, etc hi chu a sawitu Party President a nih ang ngeia party aiawh anga sawi pawh ti ila a sual tam pui kher awm lo e. Chutih lai erawh chuan Assam state nena ramri chinfel dan thuruk erawh a mimal riau thung a, Home Minister ngei pawhin a hriatpui a rinawm lem lohin Mau chi supplier pawh midangin an hriatpui vak lo maithei bawk a ni.

Tunah hian ZPM (Zoram People’s Movement) Party hruaitute chuan an interim period hman a lo zawh dawn takah chuan hruaitu thar an nei hnai dawn ni awm tak a ni a, tunge President ni ang? Tih chu zawhna lian tak awm nghal a ni. Interim period-a President ni lai Upa Lalliansawta hi chuan nih a tum tawh loh mai bakah chawlh turin a chhung te’n an nawr na viau te an ti a, chuvangin a ni hi chu President ni leh tur chuan han sawi ri ta lo phawt ila. Midang hming lang an awm lem loh laiin Pu Lalduhoma erawh Party President ni tura nawrna a na viau a ni awm e. Pu Lalduhoma hi mizo politician zingah chuan thusawi thiam leh hming sawi lar berte zing ami a ni a, fak leh chawimawitu an awm mai bakah at-chilh tute pawh a nei bawk e an tih laiin nasa taka sawichhetute an awm reng bawk a. Mahni awmna party-a nghet tak tak thei lo – zuanglawr reng mai ti an awm laiin mahni policy- a nghet leh kum 30 chuang policy thlak loa vahvaihpuitu tia chawimawitu an awm reng bawk.

Ani hi tunah kan hriat theuh angin sitting MLA a ni a, Independent Candidate atanga MLA-a tling a ni. ZPM a ni tih chu mi zawng zawngin hre vek mah ila inthlan lai khan ZPM chu political party anga pawm ala nih loh avangin Independent Candidate anga an din a ngai a nih kha. Tunah ZPM chu recognized party alo ni tawh avangin Pu Lalduhoma chuan recognized party a zawm chuan Assembly Speaker berin ama power pawhin MLA nihna a hlihsak thei a ni, an ti a. Chu chu amah ngei pawhin a hrereng chungin Party President nih chu a hnial lo e an ti thung a. Chutia MLA ni chunga Party President nih a tumna chu Side khat atang chuan MLA aiin Party President nih chu a thlang lo ang, a bansan ngam tak tak lo ang a tih theih laiin side lehlam thungah chuan Party President ni tura MLA nihna a kalsan ngam chu a fakawm takzet a ni a tih theih thung. Lehlam lehlam hian thui tak a sawi theih ve ve a, party chhungkaw dinhmun hre lo leh amah Lalduhoma rilru hre lo tan chuan a khawi zawng pawh hian sawithiam har tak a ni ve ve thei ang.

ZPM hian tunah MLA 7 an nei mek a, Opposition zinga party lian ber an ni. Nimahsela an MLA 7 te thawm erawh a bengchheng loin Rulling tan pawh an hnawksak lo ang reng hle thung a, an bial chhung theuha an hnathawh pawh langsar tham a awm meuh lo em ni tih tur a ni. Assembly House chhunga an chetla thlir pawhin Lalduhoma bakah hi chuan an MLA pakhat emaw chauh hi langsar deuh an ni awm e. Midangte hi chu ‘yes man’ an ni deuh vekin a hriat mai a, party leh bial mipui tan erawh an lo thain an tangkai viau maithei bawk e. Opposition party an nihna anga sawi pawh hian an thawm a ring lem lo viau mai a, Rulling tan pawh hnawksak thamin thu leh hla an nei meuh lo a tih theih hial ang. Opposition party ve bawk, anni aia MLA nei tlem zawk lehnghal Congress party an tluk lo riauin a hriat a, neutral taka lo thlir pawhin Congress party hnungah an kal zawk mahin a hriat.

Hetiang neuh neuh avang hian Lalduhoma chuan party president nih hi party chaklohna hria a hmahruaitua awm a thlang ta a ni mai awm mange a tih theih a ni. MLA atana thlang tlingtu mipui (Serchhip bial mipui) te tan erawh channa lian tak a ni theiin bial chhunga hmalak lai tam tak a neih mekte chu a thuanawp phah thei thung a, chungte chu loh theih lohin a chawlhsan a ngaih hmel si. ZPM a beiseina leh anmahnia rinna kan lo nghahna te kha tunah chuan a sang lutuk tawh lo deuhin a hriat a. MP leh By-Election a Congress an thawhpui kha mi tam tak thinlungah ‘anmahni party mal strength pawh lantir ngam lo’ tia star mark kan neih hlawm vang a ni ber awm e. Heng zawng zawng te hi Lalduhoma chuan a hre vekin ZPM Party khaichhuahna atan hmahruaitu nih chu a huam em ni tih hi zawhna lian tak a awm thei ta a ni. Assembly Speaker-in MLA ni chunga Party-a nihna neih rem a tih loha MLA nihna a hlihsak lem loh chuan Pu Duha tan hian a lawmawm viau turah ngai ila, chuti ni loa a hlihsak hlauh chuan Assembly House chhungah a thu thei tawh rih dawn lo tihna a ni ang a, party tan a rilru pawh a sawrbing thei zawk ngei ang. Nimahsela Court lama a kala court-in a chinfel dan erawh thudang nise. MLA nge Party President a thlan zawk dawn tih chu tuna a landan mai chuan ngaihtuah tham tak a ni awm e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy