Mizoram Premier League (MPL) 12 chu October 21, Thwhleni khan League round khelh zawh a ni ta a, Mizoram Police FC hnehtu MLS FC in semi-final an lut. MLS in semi-final an luh lai hian Saikhamakawn FC chuan uiawm takin semi-final an lut zo lo thung.
MLS an tlang
Semi-final lut tura chak mamawh MLS FC hian thawhlehni khan Mizoram Police FC an hmachhawn a, inkhelh hmuhnawm takah minute 52-naa HC Willis goal thun hmangin hnehna pawimawh tak an chang a, Dinthar FC lehpelin pathumnaah an inhlangkai.
HC Willis goal thun hmanga hnehna chang MLS FC hian MPL an hmachhawn hmasak berah semi-final an lut nghal a, record tha tak an nei. MLS hian semi-final-ah Chanmari FC an hmachhawn zui leh dawn a, final luh ngei tumin tan an khawh ang. Final luta an champion zui thei a nih chuan MPL-ah hnuhma ropui tak an hnutchhiah thei dawn.
Tling thelh apiang pawi tih a zual
MLS FC in hnehna changa semi-final an luh laiin Saikhamakawn FC chu Aizawl FC lakah an tlawm a, uiawm takin semi-final an lut zo lo. Semi-final lut teuh tak SSK FC hian an ui vawng vawng ngei ang.
MLS FC nen an inkhelh tuma boruak a awm hat vangin Saikhamakawn FC hian entu awm lo (Close door) chungin League champion Aizawl FC an hmachhawn. AFC lakah goal hnih thun bawk mah se chak tura an mamawh goal an thawkchhuak zo lo.
Aizawl FC leh Saikhamakawn FC te hi an inhnehtawk viau a, chawlhlawk hmain goal thun thei an awm lo. Second half tantir lamah SSK an talbuai zeuh a, minute 11 chhung lekin goal thum ngawt an chhuah AFC tan hian Vincent Lalduhawma chuan minute 55-naah hmahruaina goal a thun a. Minute 60-naah Malsawmzuala Tlangte in an goal hnihna a thun hnuin goal hmahruai thuntu Vincent-a chuan minute 66-naah an goal thumna a thun belh zui leh a, an hmahruaina a tizau. Si thum ngawt an phurh hnuin Suanngaihmuana chuan hun tawp dawn hnaihah goal hnih thun bawk mah se SSK tlawm tur a chhanhim zo ta chuang lo a ni.
MPL 12-ah hian tlawm nei lovin Aizawl FC an champion a. AFC bakah Chanmari FC, MLS FC leh Dinthar FC ten semi-final an lut. Rawlthar team SYS chu MPL-ah an inhamtang zo lova, Kanan FC in play-off an khelh zui a ngai dawn bawk.
MLS in MPL semi-final an lut
