MMC bawhchhiaah minister puh
Lunglei Municipal Council inthlan tura campaign MNF adviser, minister Lalchhandama Ralte chu a thusawinaah model code of conduct bawhchhiaah Congress party chuan a puh.
MPCC thuchhuak chuan, March 16-a MNF adviser Lalchhandama Ralte-in Lunglei Municipal Council (LMC) Ward No.11 MNF Campaign Office hawnna Zobawka neihah, March thla chhunga SEDP 2nd instalment sem tum a nih thu leh second phase pawh kalpui nghal tur angin a sawi tih sawiin, ‘Hei hi model code of conduct (MCC) bawhchhiatna a ni a; kohhrana rawngbawltu, Upa atana thlantlin meuh ten politics a nih avanga sawrkar dan palzut an hrehlo thin hi Mizoram politics tih chhiat zelna a nih avangin hetiang thil a thleng hi pawi kan ti hle a ni,’ a ti.
LMC inthlan tur pual hian 2023 March 2 atang khan LMC huamchhungah MCC hi hman tan a ni tawh tih hre turin minister hi an chah tih thuchhuah hian sawi.
LMC inthlan dawn a nih avanga dan bawhchhiatna a ni tih hrereng chung a, hetiang thu minister Pu Lalchhandama Ralte-in MNF Campaign Office hawnnaa a sawi chu Lunglei mipui zahlohna Congress party chuan a ngai tih sawiin, ‘MNF party-in a intiamna cheng nuai thum pawh a pek theih loh lai a, LMC inthlan tura SEDP sem tur anga minister meuhin a sawi hi zahthlak kan ti hle,’ a ti.
Minister-in MNF flagship programme SEDP a tawktarh dan chu mipui rilru hruaisual pawisak lohna lian takah an ngai tih a sawi bawk.
MMC bawhchhiaah minister puh
![](https://theaizawlpost.org/wp-content/uploads/tap_logo-min-large.jpg)