MNF party danglam bikna chu thalaiten an hriat thar zel a tul tih MNF vice president Vanlalzawma chuan a sawi.
Thawhlehnia MNF Thalai Hqrs office bearers leh Aizawl khawpuia MNF Thalai Block 13 hruaitute thutkhawm a hmanpuinaah Vanlalzawma chuan MNF chu a din tirh atangin thalaite din a ni, tia sawiin, Pu Laldenga’n MNF a din khan kum 34 mi chauh a ni a, remna ziah dawna Delhi a kal dawn pawh khan a hmatheh ber chu thalaite tho an ni tih a sawi.
“MNF nunphung hi thalaite a ni a, kumin inthlan pawh hi thalaite kutah a awm. Political party dangin MNF inrelbawlna ang hi an nei ve loa, keini chuan hnam thinlung pu in ram kan kaihruai. MNF innghahna hi India nationalism niloin, Mizo nationalism a ni. Kan danglam bikna hi thalaiten an hriat thar a, MNF hi Mizote innghahna lungphum a nih zel theihna’n thalaiten ke kan pen a tul,” a ti.
MNF Thalai vice president Zodinpuia pawhin thu sawiin, hrileng avanga sawrkarin sum harsatna a neih hi chhuanlam a ni loa, thil thleng diktak a ni, tiin, “Sawrkarin sum enkawl kawngah inrenchemna nasa takin a kalpui a, RBI-in statement a tihchhuah thar berah phei chuan Mizoram chu India ram state 29 zingah sumfaia leiba nei tlem ber pahnihna kan ni,” a ti.
GSDP atanga tehin Mizoramin leiba a lo nei tam deuh a nih pawhin, state dang chu Mizoramin state a neih hma kum tamtak chhung inrelbawlna nghet tak lo nei tawhte an nih bakah state dangte GSDP tisangtu ber pakhat chu industrial sector-a ni tih a sawi. Mizoramah chuan hnamdangte an duh ang anga an luh theih lohna tur leh sumdawnna an kalpui theih lohna turin Inner Line Regulation hman a nih thu a sawi a. Kan ram leh hnam himna tur a nih chuan kan GSDP lo hniam deuh mah se, hnam himna kan dah pawimawh hmasa zawk tur a ni, tiin, “GSDP sang taka awma hnam chimral nge kan duh, dinhmun chhe deuh zawka awm chung pawha hnam humhim tih hi kan inzawh nawn fo a tul,” Zodinpuia hian a ti.
MNF Thalai hruaitute thukhawm chuan Mizoramin inthlanpui a hmachhawn turah Pu Zoramthanga kaihhruai MNF-in sawrkarna a chan leh ngei theihna’n thalaiten chak lehzuala ke an pen theihna tur ruahmanna chi hrang hrang an duang tih an sawi.