Kumin inthlanpuia MNF-in sawrkar tura a elpui tur zawk party chu tun thlengin inrinsiak a la ngai mek tih MNF Thalai president Dr L Thangmawia, MLA chuan a sawi.
Thawhlehni hian MNF Thalai executive thutkhawm neiin, Mizo thalaite tan tangkai zawka hma an lak theih dan turte, ram pum huapa chak zawka hma lak theih dan turte an rel a. Thusawitu MNF Thalai president hian chief minister Pu Zoramthanga chu rem leh rem loa beih ni thin mah se, Pathian hruaina in a kaihhruaina hnuaiah hmalam an pan zel a. Nikum lama sawrkar tur thawka thawte pawh Budget Session a zawh dawn meuh chuan hniamlam an pan hret hret, tiin a sawi.
“Minister-te an tha em em a, opposition lamin sawiselna tur an hre lo. Covid hrileng kara theihtawp chhuaha hmalakna rah kan seng mek a. Kumin inthlanah pawh MNF-in hneh takin sawrkarna a siam dawnin a lang. Kan elpui ber tur hi khawi party zawk nge ni ang, tih kan inrinsiak rih a. MLA ngah zawk leh a lian zawka inngai party pawh hun reiloteah an chhungkhur buaina a puak keh loang tih a sawi theih loh. Kan elpuite chhiat vang emawa lawm mai loin, ram tana thawk tura kan inpekna avang zawkin sawrkar kan tum tur a ni,” a ti.
MNF Thalai vice president Zodinpuia pawhin inthlanpui neih turah MLA bial 40 zirchian tawhna atangin bial tinah MNF dinhmun a tha hle tih a sawi a. Sawrkar nghet tak neiin MNF-in hnehna a chang leh ngei dawn niin a sawi. “MNF Thalai-in ram leh hnam tan thahnemngai taka hma kan laknaah Mizote hnama min dintu Pathian duh danin kan kal em, tih inzawh fo a pawimawh a. Thudiklo hmanga politics-a inchirhthehna awm thin lakah kan fihlim tur a ni,” tiin, ram leh hnam veitu thalaite chu Mizo nationalism vawngtu MNF-a tel zel turin a sawm tih a sawi a ni.
MNF Thalai resolution:
# CM Pu Zoramthanga thawhrimna leh thahnemngaihna avanga Mizoram budget thar cheng vaibelchhe 14209.95 hman theih tura peih a ni hi lawmawm kan ti a. Assembly Budget Session-a minister hrang hrangten theihtawp chhuahin an Deptt an enkawl tih a rawn lang hi lawmawm kan ti a, MNF MLA zawng zawngte inbuatsaihna a tha in, ram tana an inpekna kan chhuang takzet a ni.
2. Mizoram Assembly House ah Myanmar leh Bangladesh atanga kan unau raltlante tana lungrual taka resolution pass a ni hi lawmawm kan ti a. Hei hian CM Pu Zoramthanga leh a kaihhruai MNF chu Zohnahthlak zawng zawngte Inpui a ni tih a tichiangah kan ngai.