MNF hi centre leh kan chheh vel ram ten an hrechiang tawh – Zoramthanga

MNF chu Mizo nationalism kengtu a ni tih central sawrkar leh kan chhehvel ram ten an hrechiang tawh hle tih MNF president Zoramthanga chuan a sawi.
Thawhtannia MNF office, Mizo Hnam Run inkhawmah Zoramthanga chuan MNF chu nationalism tawtawrawt kengtu a ni a, MNF nihna hi central sawrkar leh kan chhehvel ramten an hre tawh a. Kan unau khawvel hmun hrang hranga awmten an hria a; harsatna kara sawrkar hi MNF hian a dawl zo em em tih sawiin, “MNF hi theihtawpin mi hahum khum mah se, min hahum khumtu hi sabengtung mai a ni tih kan hria,” a ti.
Kiltin atangin beihna chitin reng tawk mah se, hnam thuthlunga din an nih avangin an nghing ngai lo tih MNF president hian a sawi. “Hnam tana ding ngam, thi ngam kan nih miau avangin kan dinnaah kan nghet a, kan buai ve ngai lo. Kum khat pawh daih lo party, party thlak reng ang mai kan ni ve lo a. Min enchhin rawh u, ti thinte hi sabengtung sakei vun sin mai an nih avangin sakeibaknei hramin hram thin mah se, tumahin an hlau tak tak thei lo. Nghet taka kum 60 chuang min hruaitu hian kan hma a hruai zel ang,” a ti.