Aizawl Municipal Corporation-a MNF a sawrkar chuan Bawngkawn Brigade-a AMC Sports Complex chu tih changtlun chhunzawm zel an tum tih MNF party chuan an sawi.
MNF AMC Ward Mo/ XIV candidate Hmingthansanga chuan thuthehdarhtute a kawmnaah he thu hi sawiin, Bawnkawn Local Council leh AMC intawm Sport Complex tih changtlun mek hi chhunzawm zel a ni anga, artificial turf phah tura hma lak a ni dawn tih a sawi.
MNF a tlin leh chuan Property Tax khawnna tur survey nei tharin, khairual taka tax hi khawn a ni anga, chawi tur zat dik tak chawi tura hma lak a ni dawn tih a sawi a. State sawrkar nen tangdunin tax pek dan awlsam zawk (application) siam an tum tur thu a sawi.
In sak phalna (building permission) leh lei laih phalna mumal leh rang zawka pek chhuah a nih theihnan hma lak a ni dawn tih sawiin, building permission pek tawh, in sa zo mai thei loten awlsam zawka permission an renew theihna tura ruahmanna siam a nih dawn bakah in sak phalna diltuten sum tlem zawk an chawi dan ngaihtuah a ni anga, sum tlem zawk chawia ‘soil test’ tih theihna tura hma lak a, mipui awlsam zawkna atan AMC-ah Soil Testing Laboratory din tum a ni dawn tinh a sawi a ni.
In hlui thiah phalna rang zawka pek a nih theihnan ruahmanna siam a ni dawn, tiin, Aizawl khawpuia chengte tan leivung paihna hmun siam belhin, leivung paih dan mumal zawk siam leh hman a ni dawn tih a sawi a. Hei hi AMC hmalakna kal mek leh a hmun tur pawh zawn mek a ni tih a sawi bawk.
Aizawl khawpuia cheng mi rethei leh harsa zawkte tan inhlawhna tam zawk siam tum a nih dawn bakah mi harsate tan vantlang hmuna tui an lak theihna tur a dahkhawlna siam a ni dawn tih MNF AMC candidate hian a sawi.
Thalai – film leh music industry lama tuimite fuankhawmna tur e.g. movie premier, musical concert, album release adt. hmun tha zawk (theatre/ auditorium) PPP mode (sawrkar leh mimal thawkho) a siam turin hma lak a ni dawn tih a sawi a. Aizawl khawpui daifem leh hmun remchang laiah mipui, a bikin thalai leh naupangte tan chawlh hahdamna leh intihhlimna hmun ‘Youth Park/ Sport Arena /Eco-Park/ Green Park’ siam duhte hma lakpui tum a ni dawn tih a sawi a ni.
Aizawlah kea kalna (footpath) tam zawk leh steel pedestrian flyover tam zawk siam an tum dawn bakah veng hrang hrangah internal road siam belh leh zauh tura hma lak chhunzawm a ni dawn tih a sawi a. Vehicle parking / taxi parking area bakah mimal lirthei park-na tur ‘smart car parking’ tam zawk siam tum a nih bakah a tul dan azirin vehicle parking hman mek chu ennawn a ni dawn tih a sawi.
“Hna thawk thei turin mawhphurhna neia Aizawl mipuiin duhsakna min hlan a nih phawt chuan, Aizawl him, hmasawn, fai leh mawi, Aizawl hlim leh thlamuang, dik leh langtlang siam chhunzawm zel kan tum a. Thangtharte ngaihtuahna fim leh zau lenna, upa zawkte thlamuanna, naupang leh nunaute himna AMC din kan tum a ni,” Hmingthansanga hian a ti a.
Aizawl chu Mizoram khawpui a nih chhunzawm zelna turin a thlavang hauh a, hum tlat an tum tih a sawi bawk.
MNF-in AMC Sport Complex tihchangtlun zawm zel sawi
