MLA inthlanpuiah an party chuan bial him 10 neisa in bul an tan dawn a, eptute chuan bial 30 dang atangin sawrkar siam an tum ve thung dawn tih MNF president Zoramthanga chuan a sawi. Zirtawpnia MNF office Mizo Hnam Runa inkhawmah Zoramthanga chuan tunhma lamah MNF-in bial 5 hloh sa tlukin inthlan an hmachhawn thin a. Tunah erawh bial 10 neisa an ni, tiin, hengah hian ZPM leh Congress tih tham an awm lo niin a sawi. “Eptute chuan bial 30 atangin sawrkar siam turin an rawn bei dawn a, an tan beisei tur a tam lo hle ang,” a ti.
MNF bial him nia a sawi zingah East Tuipui, West Tuipui, Thorang, Tuichawng, Lawngtlai East, Lawngtlai West, Mamit, Hachhek leh Dampa te pawh a tel tih a sawi.
Congress, PC leh MNF te an sawrkar laiin an chhe vek nia mipui fuihin, ZPM thuvawn chu ‘MNF leh Congress ni lo’ tih a nih thu MNF president hian a sawi a. An thusawi awihtu mi tlemte chu an innghahna awmchhun a ni mai, tiin, East Tuipui, Khawzawl, Saitual, Lengteng, Kolasib leh Serlui bial te enin, ZPM tlinna tur a vang hle tih a sawi.
Aizawlah pawh ZPM dinhmun a chhe sawt hle niin a sawi bawk. “Candidate an set a, anmahni leh anmahni an buai a, an buai tulh tulh mai. A tira sawrkar tum kha tunah chuan an thaw lian ngam tawh lo. Policy mumal an neih loh vang a ni. Keini chu kum 60 chhung kan lungphumah nghet takin kan ding a. An ni chuan pawl an sawn apiangin policy an thlak. Kalphung mumal an neih loh avangin candidate an siam a, an buai ta vek a ni. Hei vang hian MNF a sawrkar leh ngei dawn,” a ti.
Pathianin Zoram, kan Jerusalem-ah unau min suihkhawm a tum a, enge lo thleng kan en zel dawn tih chief minister Zoramthanga hian a sawi a. Nationalism-a MNF sawrkar a ngheh tlat avangin Manipur buainaa Zofa thite phumna tur, martar thlanmual chungchangah Aizawl care-of loin an chingfel thei loa, Union Home minister Amit Shah, Manipur leh Assam chief minister-te pawhin zanlai sawi loin thurawn an rawn la niin a sawi.
“Burma, Bangladesh leh Manipura kan unauten hetah vote nei lo mah se, keini aiin MNF sawrkar a pian loh an hlau zawk. Kan Jerusalem-ah hian hnam thinlung pute sawrkar an mamawh a, tui anga nghet lote sawrkar a pian lohna’n theihtawp chhuah an tum,” a ti.
MNF-in bial him 10 nei sa in bul kan tan dawn – Zoramthanga
