MNF-in MP pahnih chhuang
Mizo Nationanal Front chuan Manipur-a buaina avanga Zofate tawrhna thleng mek ti reh tura hma an laknaah Mizoram MP pahnih C Lalrosanga leh K Vanlalvena te an chhuang hle tih an sawi.
MNF Gen. Hqrs. thuchhuak chuan Manipur buainaa Zofate tawrhna tihtawp a nih theihna’na Mizoram sawrkar hmalakna bakah Lok Sabha MP Pu C Lalrosanga leh Rajya Sabha MP Pu K Vanlalvena te hmalakna chhuanawm a tih thu sawiin, a tul anga theihtawp chhuaha Zofate himna tur leh Kristian sakhaw himna atana an beihna chu ropui a tih thu a sawi.
‘Kan MP pahnih hian sawrkar laipui thuneitute hnenah rang taka zualkoin, theihtawp chhuahin hma an la a. Central minister-te hnenah tawngka leh lehkhain Zofate harsatna leh buaina chinfel a nih theihna turin thu an thlen nghal a. North East MP-te leh MP dangte bekuala hma an la hian awmzia a neiin a hlawk em em a. Buaina avanga zirlai, hnathawk leh tangkhangte hruaichhuah an nih theihna atana kan MP-te hmalakna hi a chhuanawm kan ti takzet a ni,’ a ti.
MP pahnihin Mizoram chhung leh pawna Zofate thlavang hauha theihtawp chhuaha hma an lak mekna chu mipuiin kan thlawp thu te, kan theihna zawna kan thawhpui zel tul a tih thu a sawi bawk.
‘Pu K Vanlalvena’n Manipur buaina chinfel a nih theihna tur leh he buaina avanga pawisawilote tawrhna leh thihna chungchang chhuichiang tura Kristian MP-te telna, Joint Parliament Team din Prime minister hnena rawtna a thlen hi tihhlawhtlin a nih ngei kan beisei a ni,’ MNF thuchhuak chuan a ti.
MNF-in MP pahnih chhuang
