Site icon The Aizawl Post

MNF-in ramri chinfel loh hram dan a ngaihtuah a ang – Duhoma

Assam nena ram inchuhnaah MNF chuan an sawrkar chhungin ramri chinfel loh hram dan a ngaihtuah nia a lan tak thu ZPM leader Lalduhoma chuan a sawi.
Thawhtannia an party office-a inkhawmah ZPM leader chuan Assam nena ramri chin nia Mizoramin kan sawi a inang lo chu kum 58 chhung kan buaina a ni tawh a, sawifel a ngai tih a sawi. Nikum November-ah khan thla thum chhungin ramria mipui leh khua awm dan (geo spatial extent) chian a ngai tih Mizoram sawrkar chuan a dawng a. Tihfel zai a rel lo nge, thla hnih aia tam a ral hnu kumin January 20 khan committee a ko chauh a, zirchiang tur committe a din chauh tih a sawi.

“Zirchian hman ngaihna a awm tawh loin a lang a, kan sawrkar hian an term chhungin ramri hi chinfel loh hram dan a ngaihtuah niin a lang. A rang thei ang berin zirchiang se, inbiakna awm leh huna zirchianna thehlut thei turin tan la se, kan party-in puih theihna kan neih chuan puih kan inhuam a ni,” a ti.

Bounadary Committee atang hian party thenkhat chu an inhnukdawk a, ZPM chu an la tel a, a theih chin chinah sawrkar an thawhpui dawn tih Lalduhoma hian a sawi a. Chutihrualin tel ve na tlak a nih loh hun a thleng a nih chuan an tel lo mai dawn tih a sawi.

Ramri chungchang ngaihtuah a nih mek laia ramri nghawng thei thil a thleng leh thin chu pawi a tih thu sawiin, “Hmanni lawkah Assam chief minister chuan Mizoram chin zau tak laklet a nih thu Assembly House-ah a sawi a, kan chief minister hian House-ah a sawi ve ngam angem? Assam-in Aitlang an luah a, an ta neih a; Vairengte miten hmunphiah an kek thei lo leh identity card siam a ngai ringawt pawh hi tlawmthlak tak a ni,” a ti.

NHIDCL-in kawngpui a laih turah package I & II chu Cachar district huamchin leh Mizoram thenkhat a nih thu te, package II ah hian Vairengte chhungkua engemawzat an beh laiin compensation chu Assam pek tir tum a nih thu te, package III atangin Mizoram enkawl chin, tiin Mizoram sawrkar chuan a thlen nia an lo hriat thu te ZPM hruaitu hian a sawi.
“Ramri kan inchuhnaah Assam lam hi point tha tak kan pek belh ta a, a pawi takzet. He sawrkar hian hun reilote ala neih chhung hian inchi khat pawh tawlh tawh lo se, Assam hnenah point pe tawh lo se, tiin kan ngen a; a hnu leha sawrkar tur tan pawh harsatna siam tawh lo turin kan ngen a ni,” a ti.

Exit mobile version