MNF-in wine leh beer thlah zalen tum pawi ti

MNF-in wine leh beer thlah zalen tum pawi ti
MNF party chuan sawrkarin wine leh beer thlah zalen a tum chu pawi an tih thu an sawi.
Nilainia Mizo Hnam Runa MNF office bearer thutkhawm chuan resolution 6 a pawm a. Kohhran leh tlawmngai pawl duh loh, khawtlang leh chhungkua tam tak tichhetu a nih avanga zu khap burna dan neih mek siam danglam a, zu thlah zalenna hmahruai atan wine leh beer thlah zalen a ni tur chu pawi an tih thu a sawi. Sawrkarin Excise & Narcotics Department kaltlanga ualau taka mi thenkhat lei theih tura zu dawr a siam tur chu tha an ti lo tih a sawi a ni.
Assembly Session neih meka chief minister, House leader ni bawk rorelna hmuna a khawsak dan chu ram hotupa ber tih atan mawi lo tam tak a awm thin tih sawiin, pawi an tih thu a sawi. ‘House-a chhang let tur awm ve lo, hruaitu hmasate sawisel thanhnan a, mite thatna reng reng hmu thei lo leh hmu thiam lo CM kan nei hi a pawiin a vanduaithlak a ni,’ an ti.
Hetihlai hian Assembly Session neih meka MNF MLA-te chet dan an chhuangin an inbuatsaihna a tha an ti a. Ram leh hnam tana tha tur huai taka an dinpui ngam thin leh sawrkar kalsual tur an venna kawnga an chet dan chhuanawm an tih thu an sawi.
Village council leh local council inthlan zawh taka MNF-in seat thahnem tak an la thei chu lawmawm an tih thu an sawi a. Opposition party ni chunga LC/VC inthlan an hmachhawna result chu lawmawm an ti a; MNF candidate-te ringtawka thlangtlingtu mipui chungah lawmthu an sawi tih sawiin, MNF VC/LC zawng zawng pawh an mawhphurhna hlenchhuak turin an beisei tih an sawi a ni.
ZPM sawrkarin an intiamna tihhlawhtlin loh an ngah em em tih sawiin, mipui beisei an pha lo tih an sawi. Chutih laiin loneitute hnena an intiamna erawh tihlawhtling ngei turin MNF chuan a phut tih sawiin, ‘Phatmarna leh chhuanlam dawrawm te te siamkual siamkual loin, kuthnathawktute thar sawhthing, hmarcha, hmunphiah leh aieng hi a bo a bang awm loin lei vek rawh se,’ an ti.
Lengpui Airport IAF kuta hlan chu MNF chuan engti zawng mahin rem a ti lo tih an sawi a. Sawrkarin NGO zawng zawng leh party hrang hrang duh dan kalha hlan luih a tum a nih chuan a tawp thlengin an do dawn tih a sawi a ni.