Lalrinmawia
Hills Street
A KAM KEUNA :- MNF kha covid period laiin an sorkar tluan a ni deuh ber a, an sorkar tirh phat khan an Minister leh MLA viak tha rualte chet dan kha a hmuhnawmin beiseina pawh a sang khawp mai. Mahse, a hun kha a rei si lo. Covid a lo lang nghal a, Covid kha MNF party khan an hnathawh tur thawh theih lohna chhanah inngaiin an chhuanlam nasa a, sawi pawh an sawi rei hle. Khatih rual khan, covid kha chhuanlam ber a tling lo tih chu, tuna rorel tan ve mek ZPM-te sawi nasat ber a ni tih chu kan hre theuh awm e. An party chhungril va hre ve phak vek lo mah ila; anmahni chhungkuaah leh mipui mimir tlangkam ka hriat dante hi han puanchhuah tul tlatin, ka hria a, chutih rualin an hun laia an chet dan chhete pawh hrut tel zuai i la, min mawlh ve em a, ka han tlangaupui ve a ni e.
INDUHSAKNA HLEIHLUAK AN TIH KHA TAK TAK NI MAW? :- Engtin nge an hna lian pek bikte kha chanvo (share) hrang hrang an insiam dan chu keiin hre pha ve lo mah i la; Chief Minister Pu Zoramthanga’n Kamrula bakah a unau Zoramchhana-ten hna a pek dan kha chu social media hrang hrangah kan hmu tawh a. An pu Chief Minister kal chhuak ta ber khan engtin nge (amah pu Hriata tawngkam takin a CHALAI) chu kan hre ve pha lo a. Eng pawh ni se, tlangkam ti leh social media hrang hrangah Inpui ber nghaktu Hnam Run worker-tam takte an ro vawng vawng an ti bawk si a, a buaithlak ve deuh det chu ka ring.
Keiin ka lo hriat dan ve mai mai dan chuan pu siar, pu siar tih ang deuhin, Chief Minister kal chhuak tain, Kamrula a hman ang deuh khan, an Minister thenkhat te pawhin Kamrula an nei zel niin an sawi, tak tak ni maw..!?
AN PRESIDENT PU ZORAMTHANGA HIAN KIAN ZAI REL SE :- Amah Chief Minister Pu Zoramthanga khan MNF thuneihna kha a pum hmawm ni berin a lang a, party president leh Chief Minister nih a fawm a, hna lian zawng zawng chu ama enkawl PWD-ah a luhtir deuh vek a an ti. Tin, Pu Zoramthanga khan tunlai media thil tih theihzia leh chak tawhzia hi a man thiam meuh lo niin a lang. An party tan chuan Pu Zoramthanga hi kum upa deuh tawh mahse; chawlhtir mai chu a uiawm hle mai thei a; mahse, thangthar-ten hruaitu ngai hlir nin chin an nei tawh a, a aiawh turin midang kian tawh se, an party chuan an that pui a beisei awm. Kawng leh lamah chuan hnam movement leader a nihna erawh a ngaihsanawm a, party-ah thunei tak pawhin la awm mah se; MLA candidate atan chuan ding tawh lo se, chu chu mipuiah puang chiang se, an thatpuiin a rinawm.
ELECTED OB ATAN MI THAR AN MAMAWH BELH :- Tuna an elected OB-te hi anmahni zawn zawnah chuan mi tha tak tak vek an ni a. Mahse, a pawimawh lai ber tun inthlanpuiah pawh khan Zoram hmun hrang hrangah party tan an chet chhuah hmuh tur a vang hle a, an awm hmunah lah an party tana an tangkaina hmuh tur a awm meuh lo. Tuna an elected OB-te hian neutral leh thalai an hip tawh lo khawp mai. Chuvangin, mipui rinhlawh leh tur chuan an chawlh then a ngai a. Kohhran lamah pawh mi hming tha, la valai deuh hmel thar pahnih khat chu an awm belh a tul khawp mai.
CHIEF MINISTER ATAN ZAWRH BIK NEI SE :- Tun tum inthlanpuiah khan sawi rik nasat em em chu, MNF official candidate mi tha tam tak an awm a. Mahse, “Chu mi kha mi i vote chuan Pu Zoramthanga i vote a ni,” an tih thawm kha a ring hle. Bial tin deuh thawah MNF official candidate-te khan vote an hmuh tlem phah niin an sawi. Chuvangin, MNF hian kum 2028 atan chuan chirhdiak leh vaivut kai lo, kum lamah pawh la upa lutuk lo, tualchhung politics thiam leh central lamah pawh mikhual lo tak Chief Ministerial Candidate nei ta se an invawrh kang viauin a rinawm.
PARTY THUPUANGTU NEI SE :- MNF hian hman atang khan party thupuangtu (Spokes person) an nei lo a, an president khan a duh duh a sawi a, an party thupuangtuah a mah a awm nghal a, a duh duh a sawi a, thangtharte nuihzat a hlawh phah tlat a ni. National party lianten an neih ang hian an party-ah mi thiam tak tak an awm a. Phai lam media-te pawh duh tawka hmachhawn thei tur entirnan- IIT chhuak Doctorate Degree nei te, Professor, Engineer leh Media lama mi hriat hlawh an neihte chhawr tangkai thiam se, an party chuan nasa taka hma an sawn a rinawm. MNF-ah hian academic line-ah te, Engineer leh line hrang hrangah mithiam, an thiamna hman tangkai si loh an ngah lutuk.
AN MI THIAMTE PHOCHHUAK THIAM SE :- MNF elected OB-te,an thuneitu sang National Core Committee leh Political Affairs Committee-te hi kum lamah an upa hlawm tawh hle a. An committee nikhua hian media lamah kan lo hmu thin a, kan hmuh ngai hlir hmana mi te, Chhura rual zet zet an ni fur mai a, mipui pawhin kham chin hi an nei thin. NCC, PAC leh GS-ahte hian an thiamna chhawr tangkai theih tur Ex-MLA leh Ex-Minister engemaw zatte hi dah tawh se, tuna mite hi chuan an party dan angin Adviser rinawm takah awm tawh hlawm se, an thatpuiin a rinawm bawk a, Vangvat kai chin ringawt chanvo tha an inpek reng ringawt chuan dinchhuahna chance an nei sang tawh lo.
A TLANGKAWMNA :- MNF hi Mizo Hnam run party, Mizo Nationlism vawng nung zeltu tur leh kengkawh rengtu tur an in tih angin zirlai pawl hruaitu hluiten an bawh viau a, chutih rual chuan zirlai pawl lam an tih lutuk chuan mipui rin an hlawh lo thei. An party-ah mi hriat leh rin hlawh Kohhran rawngbawltu, Prominent Citizen leh NGO hruaitu bakah tunlai thalaite lawm hlawh milarte an seng luh thiam a tul hlein a lang. MNF hian mi leh sa an la ngah hle a, chutih rual chuan hruaitu thar thangtharte ngaihzawn tur inruat thiam se. Tun MLA inthlan zawh taka an vote dinhmun en pawhin an la chhe lo hle a, chuvang chuan oppsition party lian ber an nihna hi insiamthat nan hmang se a duhawm hle a ni.
MNF hi hmel thar an siama an inrem that loh chuan opposition-a an awm chhung hian an mi leh sate beidawng party chhuahsan an awm nual mai thei, chutiang anih chuan kum 2028 ah pawh tuna an MLA neih zat aia tlem nei thei an ni. Tin, tuna an party inthlan that tur boruakah pawh Vangvat kai ringawt duhsakna leh leader inchuhna boruak lian tak awm lo bawk se. Hei hi MNF hruaitute hian an dinchhuah lehna tur chuan an hriat makmawh a tul hle bawk.