Sinlung Hills Council inthlan turah MNF leh HPC (Reformed) chu an thawkdun dawn a. Candidate puannaa thu sawitu MNF president Zoramthanga chuan ZPM-in an sawrkar hmaa an tih loh tur an sawi chu an sawrkar hnu ah ti ta vek emaw tih tur a ni tih a sawi.
Thawhtanni khan MNF office Mizo Hnam Runah kumin November 5-a Sinlung Hills Council inthlan neih tura MNF leh HPC (Reformed) candidate tur MNF president Zoramthanga’n a puang a. An thawhdunna thuthlung chhiar chhuah a ni bawk.
MNF president chuan sawrkarna siam mek ZPM chuan inthlan hmaa an intiam anga ‘kan ti ang’ an tih zawng zawng an ti lo a. ‘Kan ti loang’ an tih zawng zawng an ti ta vek emaw tih mai tur a ni, tiin, “Mipuiin kan zawn hi Mauruangi niloin Bingtaii zawk a ni tih kan hre chhuak mek a ni,” a ti.
MNF chu Mizorama political party awm mek zinga ruhrel lian ber leh mi nghet ngah ber an ni tih a sawi a. MNF sawrkar awm tawhten Pathian malsawmna an dawng nasa hle tih a sawi. “Peace Bonus kan dawng a, MINECO dinin, Lunglei kawng sial, Millenium Centre sak leh hmasawnna ruhrel lian kan din tam hle. Pathian leh kan ram tan, tih thuthlunga ding kan ni a, hei hi Pathianin kan felnaah min ruatsak a. Pathian leh kan ram tan mipui rawngbawl leh turin MNF hi kan tho chhuak leh dawn a ni,” Zoramthanga hian a ti.
SHC inthlana MNF – HPC (R) candidate, an dinna tur bial:
8 Khawlian – Rochungnunga
8 Phuaibuang – Lord Joyfula
8 Suangpuilawn – Vanlaltluangliana
8 Vanbawng – Ricky Lalremsanga
8 Ratu – R Lalhmingthanga
8 New Vervek – C Lalnuntlanga
8 Sakawrdai South – Lalhriatchhunga
8 Sakawrdai North – Melody Lalchhuangzeli
8 Zohmun – Benjamin Lalrawnliana
8 North Tinghmun – R Lalfakzuala
8 Saipum – Laldawmliana
8 Saiphai – Zokhumthanga