Daily Newspaper

MNF MLA-te chetdan hi mipui zahlohna a ni – Lal Thanhawla

25

Serchhip bialtu MLA Lalduhoma, MLA a nihna atanga paihthlak tuma MNF MLA-ten Speaker hnena an hek chu Mizoram mipui leh Serchhip bial mipui zahlohna leh pawisak lohna lian tak nia a hriat thu Congress president Lal Thanhawla chuan a sawi.

MPCC president hian thuchah siamin, dan bawhchhiatna lian tak a awm avanga MLA atanga inchawlhtirna a awm a nih chuan tu tan mah hriatthiam loh tur awma a hriat loh thu a sawi a. Chuti ni lo, thil kalphung langchiang sa reng, mipui pawhin an pawm thlap thil chingpawr lui a, ram leh hnam hmasawnna leh ram tana thil tha zawk tur ngaihtuah vang pawh niloa mahni thawhpuite paihthlak tuma hmalakna chu a dem thu leh politics chu thianghlim taka kalpui zel tha a tih thu a sawi.

Kum 1987 MLA inthlana Election Commission of India registration la nei lo MNF party candidate chu independent veka dingin seat 24 laa sawrkarna an siam thu te, an dinhmun hrethiam takin Congress leh PC party chuan an pawm mai thu leh, an hekin an thik buai hek loh thute MPCC president hian a sawi.

“A hnu kum 1989 inthlanah Congress kan sawrkar a, MNF (D) pawhin registration la nei lo mah se, independent-in an ding a, seat hnih an la a, an tlinna bialah pawh anmahni tantute siam chhoin member thar neiin phur takin an lawmlut a. Ram tana thawkho kan nih avangin an dinhmun hrethiam takin, tha takin kan en a, tihchhiat emaw hek emaw kan ngaihtuah lo. Ram hmasawnna kawngah tha takin kan thawkho mai a ni,” a ti.

‘ZPM MLA’ tia an sawi maite chu independent-a ding ni mah se, a hma atanga ZPM hming veka kal an nih tawh avang leh ECI-a registration la nei lo an nih vang maia independent-a ding an ni tih an pawm vek thu Lal Thanhawla hian a sawi a. “Congress party tan ZPM chu hnawksak viauin lang mah se, mipui thlantlin an nih miau avangin Pu Lalduhoma leh a thawhpui MLA-te hi ZPM MLA-ah Congress party chuan kan pawm thlap a ni,” a ti.

Hetiang hi Mizorama politics kalpui dan tur nia a hriat loh thu leh MPCC hruaitu hian sawiin, “Mizo Kristian, kohhrana rawngbawltute tan phei chuan midangte chhiatna tur ringawt ngaihtuaha hma lak hi thil tih loh tawp tur a ni. Lal Isua thusawi, ‘Mi in i chunga an tiha i duh tur ang zelin mi chungah pawh ti ve rawh u’ (Luka 6:31) tih hi politics-ah pawh kan innghahna tur ni zel se. MNF MLA-te hmalakna avanga Mizo Kristian-te hming a chhe zawnga hriatreng a ni tawh tur hi pawi ka ti hle a ni,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy