MNF paih na’n Congress hman a ngai
– Zodintluanga
Mipuiin MNF sawrkar an ning tawh a, chu sawrkar chu kan thiat dawn a nih chuan mipuiin ngaihtuahna fim pu a Congress party an hman a ngai tih MPCC tresurer Zodintluanga chuan a sawi.
Congress Legislature Party leader ni bawk Zodintluanga chuan, Lungleiin MNF sawrkar hi thlak an duh hle tawh tih mi a kawmkualna atangin a chiang a. Chu sawrkar chu kan thiat dawn a nih chuan mipuiin fimkhur tak leh ngaihtuahna fim tak kan put a ngai tih a sawi.
2013 leh 2018 MLA inthlana Lunglei mipui vote thlak dan khaikhinin, Congress candidate thlantlin te aiin anmahni thlaktu MNF candidate thlantlinte vote hmuh a tlem zawk hle tih a sawi a. “Heta tanga thil chiang chu, party dangte nena kan inpawlh nasat tak avangin kum 2013-a Congress candidate-te vote hmuh aia tlem fe hmu chungin MNF an tling thei. Hetiang dinhmunah hian kan ding leh thei tih hria ila, party dang – ZPM kan vote vak hian, tling zo tak tak chuang si lo in mipuiin kan nin em em MNF bawk hi an chak leh thei a. Chuti a nih chuan Lunglei khawpui enkawl hna chu Pu Zoramthanga bawkin a thawk leh dawn tihna a ni,” a ti.
ZPM chuan MLA inthlanah vote hmu ve nual mah se, hemi hnulama VC inthlan hmasa bera Lungleia an vote hmuh dan enin, Municipal Council inthlanah sawrkarna chance an nei lo tih a lan avangin, Pu Zoramthanga kaihhruai MNF paih nan chuan mi leh sa nei tam, Congress party hman a ngai tih Zodintluanga hian a sawi bawk.
ZPM leader Pu Lalduhoma’n sawrkar hnathawkten an eiru a nih pawhin ziaawm a tih thu te, an ni chuan ram tan niloin anmahni tana lehkha zir leh officer nih tum, mahni hmasiala kal chho nia a sawi thu te sawichhawngin, sawrkar hnathawkte tan rilru nat thlak a tihpui thu Congress hruaitu hian a sawi. “Minister ka nih ve lai khan sawrkar hnathawk ram hmangaih em em, eiru ngai lo, sawrkar hnathawh hi ram rawngbawl naa ngai tam tak ka hria a ni,” a ti.
MNF paih na’n Congress hman a ngai – Zodintluanga
![](https://theaizawlpost.org/wp-content/uploads/tap_logo-min-large.jpg)