MNF sawrkar laiin Mizoram ramri zauh a ni a, hnam party rorel laia sawrkar chetdan hian ram mipui tan a thlanmuanthlak hle tih MLA Robert Romawia Royte chuan a sawi.
Thawhtannia Mizo Hnam Run-a inkhawmah Hachhek bialtu MLA Robert Romawia Royte chuan, MNF sawrkar laiin Mizoram ramri tihzauha humhalh thar a ni, tiin, “Kanhmun thlang Mitdel lui, Thinghlun bul leh hmun tam takah MNF sawrkar khan ram a zauhin a luah hlen a. Hnam party rorel laia sawrkar chet dan hi a chhuanawm a, ram mipui tan a thlamuanthlak em em a ni,” a ti.
Bible-in dawt sawi a haw em em a, dawt sawitu chu ramhuai sual (devil) tiin a sawi hial niin a sawi. “Kan chief minister-in Assembly Session chhung leh pawna dawt a sawi fo hi a pawi a. MNF chuan thudik hmangin dawt hi kan hneh tur a ni. MNF chuan sim ngai leh insiamthat ngaihna laia insiamtha in, Mizoram chhung ami leh state pawna hnamdangte thlengin sawrkar leh mai tura min beiseina hi tihlawhtling ang u,” a ti.
MNF movement khan rah tha tam tak a chhuah niin MNF National Core Committee member Robert Romawia hian a sawi. India Danpui hnuaia Mizo hnam leh sakhaw humhimna bakah ram neitu nihna leh ram chunga thuneihna thlengin Mizo mipui kutah a awm, tiin, “Hetiang Danpui hnuaia thuneihna hi Nagaland tih loh chuan India ram state dangin an nei lo. India Danpui Article 371G hnuaia inhumhimna hrang hrang bakah Inremna Thuthlunga ILP tihnghehna, MZU leh High Court bakah state puitlinga Mizoram hlankai pawh MNF movement rahchhuah vek a ni,” a ti.
MNF sawrkar laiin ramri zauh belh – Robert Romawia
