Mizo hnam danna atan MNF a thawh kan leh thuai a tul tih an party hruaitu F Aithanga chuan a sawi.
Thawhtannia MNF office Mizo Hnam Runa inkhawmah MNF National Core Committee member F Aithanga chuan political party satliah ni ve lo, Mizo hnam movement kengnungtu, Mizo hnam lungphuma innghat an ni tih a sawi.
ZPM-in kalphung thar an tihah a phaw vuak umin mipui kan kal vel mai mai tih a sawi a. Rammute ram mut chhan leh an thih chhan pawh kan ngaihtuah pha ta lo tih a sawi.
“Martarte thisen kha eng angin nge a luan a, chu chuan kan thinlungah eng chin chiah nge a luah, tih kan hre pha ta lo. Martarte thisen zahawm zia kha hrereng ang u. Hnam thinlung, Mizo nationalism tak tak kha thangtarten kan ngaihtuah pha ta lo,” a ti.
MNF chuan thil tha chu su ngamin a thihpui ngam tur a ni a, a tha lo hnualsuatin zawldawh theihna leh tawrh feina a nei tur a ni, tiin, F Aithanga hian a sawi a. Mizoram leh hnamin hma a sawn zelna tur leh Mizo hnam dam nan MNF a thawhkan leh thuai a tul tih a sawi. “Mizoram hian kalphung thar awmze neilo a mamawh loa, kalphung fel tak leh nghet tak neih a tul zawk,” a ti.
MNF thawh kan leh thuai tul ti
![](https://theaizawlpost.org/wp-content/uploads/tap_logo-min-large.jpg)