Daily Newspaper

MNF VC thiatah LADC sawrkar puh Dan zawm lo chauh an ni – LADC EM

10

Lai Autonomous District Council chuan tunhnai khan village council 14 chu dan zawm loa puhin a suspend a. MNF party chuan Council-a Congress sawrkarin politic-a hamthatna umin VC a thiat nia a puh laiin, Council hotute chuan party lam thlir loin dan zawm lo chauh an thiat tih an sawi ve thung.

MNF District Hqrs Lawngtlai chuan Lawngtlaia thuthar thehdarhtute an kawmnaah LADC-a Congress sawrkar chuan chhuanlam fahrah te te hmangin MNF VC a thiat chhoh mek tih sawiin, thiah tum mek pawh la nei chho zelah a puh.

Lawngtlai MNF hotute sawi danin, LADC sawrkarin VC 14 a suspend zinga VC 12 chu MNF VC an ni a. Congress VC pahnih a suspend tel chu an party a tuitla tawhlo te an ni. Tunah hian VC thiahtuma Inquiry Commission tirh mekna VC 15 an nei a, chu pawh MNF sawkarna vek an ni, an ti.

Hetianga MNF VC an suspend chhan hi MDC inthlan a hnai tawh a, MNF VC hnuaia inthlan hmachhawn an huphurh vang leh 15th Finance Commission atanga sum lokal, MNF VC kuta a luh an hlauh vanga VC thiat a, thiah tur dang pawh dap zel an nih thu an sawi. Council-in VC a thiah takah te hian care taker atan Congress party mi, an thawhpui theih tur an dah nghal zel niin an sawi bawk.

LADC executive member, Local Administration changtu Chhuanawma chuan LADC sawrkarin VC a suspend-te chu politics-a hamthatna hmuh tuma beihna a nih loh thu amah kawmtu Lawngtlaia thuthar thehdarhtute a hrilh ve thung.

“VC suspend takte hi hekna awm vek, Commission-in a chhuichian hnua VC dan dinglai behchhana sawrkarin a suspend an ni. MNF District Hqrs. hruaituten chhuanlam fahrah te te hmanga suspend anga an sawi hi thu belhchian dawllo a ni a, englai pawhin enfiah theih reng a ni,” a ti.

Suspend zingah Congress VC pawh an tel thu sawiin, hekna awm bawhzuina kalzelah Council sawrkar chuan suspend phu-a a ngaih vangin a suspend mai tih sawiin, VC-te kuta 15th Finance Commission sum lut tur ngaingam loa an puhna pawh, thu awmze neilo a ni, tiin, sawrkar chuan hmasawna hna a thawhna VC-te chu eng sawrkar pawh nise thil tha turah chuan a thawhpui thei vek tih a sawi. Tun dinhmunah MNF VC tam zawk daihna LADC sawrkarah pawh 15th Finance Commission hnuaia hmasawnna hna thawh turte chu VC kuta dah tura ruahman vek a ni tawh tih a sawi.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy