Mizoramah mobile phone a pung thur thur a, mihring aiin mobile phone a tam zawk tia sawi theih a ni. Chutih laiin khaw thenkhatah chuan mobile phone a la la lut lo a, Mizoramah mobile phone awm lohna khaw 120 a la awm.
Economic Survey of Mizoram (2022-2023), tun hnaia chhuakah khaw 120-ah mobile phone a la awm lo tih tarlan a ni a, hei hi nikum March ni 29 thlenga an chhinchhiah dan a ni. Hemi hnu hian khaw thenkhatah chuan mobile phone hi a awm tawh turah ngaih chu a ni.
Economic Survey of Mizoram bua a lan danin, 2022 March ni 29-a State Broadband Committee thutkhawmnaah khaw 120-ah mobile phone a la lut lo tih hi an sawi a, heng khuaah hian mobile phone a awm theih nan mobile tower 116 a tlem berah bun (install) a ngai ang tih an sawi bawk. Hei vang hian hmun thenkhatah ‘no network coverage’ a awm phah tih a ni bawk.
Bharat Net project hnuaiah Mizorama VC awmna hmun 763-te chu mobile phone hmanga thlunzawm vek tum mek a ni.
Telephone subscribtion tam lam chhutna Indian Telecom Services Performance Indicators, 2022 January-March chhunga mi-ah chuan telephone hi Mizoram a tam a, telephone tam lam ‘tele-density’-ah Mizoram a sang; India ramah mihring 100 zelah phone 84.88 a awm laiin Mizoramah chuan mihring 100 zelah phone 113.73 a awm.
Tele-density-ah hian Mizoramah khawpui leh thingtlang a inthlau lo; 2022-ah Mizoram thingtlangah mihring 100 zelah phone 111.95 a awm a, khawpuiah 115.20 a awm. A hma kum 2021-ah phei chuan thingtlangah a tam zawk a, thingtlangah mihring 100 zelah phone 117.30 a awm laiin khawpuiah 116.08 a awm.
Mobile Phone thlen lohna khaw 100 chuang
