Prime Minister Narendra Modi leh French President Emmanuel Macron chuan Thawhlehni khan Mumbai-ah India-France Innovation Forum 2026 an hawng a, inkungkaihna tha, hlutna inpek tawn leh thil thar chin chhuahna leh technology-a ram pahnih thawhhona a nih thu a sawi.
Modi-a chuan French President Macron nen hian kum 2026 hian India-France Year of Innovation atan hman ni se tiin thu an titlu dun tih a sawi bawk.
India-France Innovation Forum-ah hian prime minister chuan, “Vawiin hian khawvela thil thar chin chhuahna lian ber pahnih an awm dun a. India leh France an sawi chuan kan inkungkaihna hi thil thar chin chhuahnaah chauh ni lovin, inrin tawnna leh hlutna inpek tawnah a ni tel ang a. President Macron-a nen hian kum 2026 hi India-France Year of Innovation ni se kan ti a. Kan lawm ringawt dawn lo va, kan tumna kan inpe tawn dawn a ni,” a ti.
France-a India Innovates 2026-ah Indian tech startup lianten khawvel huapa hriselna, sik leh sa leh himnaa chona chin felna an pho lang dawn tih a sawi bawk.
“Hei hi India-France inkungkaihna atana kum pawimawh a ni a. Mite an inpawhna a thuk sawt a, insustry inkungkaihna tihlen a ni,” a ti.
India chu startup ecosystem-ah a thang a, Startup India programme avangin khawvela startup hub hmun lian ber pathumna anih thu leh kum 2014-a pali chauh awm chu tunah chuan 120 chuang a awm tawh tih a sawi.
Prime minister hian India-in Atal Innovation Mission a kalpui, February 24-a kum 10 tling tur chu khawvela grassroots innovation initiative lian ber huangah a tel thu leh Tinkering Lab 10,000 chuang kaltlangin zirlai innovator maktaduai 10 chuang an inziah luh tawh thu a sawi.
Sorkar chuan AI, biotech, clean energy, textile leh infrastructure-ah thil thar chin chhuahna huang zauh zel a tum niin a sawi a, hmeichhiate kaihhruai zirbingna leh mahni kutkawih siam chhuahna pawh tihchak zel a ni tih a sawi.
French president hi AI India Summit hmang turin India hi a tlawh a, a cham chhungin prime minister bakah President Droupati Murmu leh External Affairs Minister S Jaishankar-a te pawh a kawm a ni.
Modi-a leh Macron-a ten India-France Innovation Forum hawng
