Huna Kawlvawm
Officer corrupt-te pension luihtirna atan Ministry te kar khat chhunga an hming theh lut vek tura tih an ni
THU HMA
He thu hi December 6,2019 a mi tawh a ni. May 31, 2019 ah Modi 2.0 Sorkar a piang a, thla 6 an Sorkar hnua an hma lakna ang hian Mizoram Sorkar hma la ve se kan duhin kan ngam ang em?
December 06, 2019 :
Narendra Modi kaihhruai Sorkar chuan Sorkar laipui hnuaia ministry 45 zet leh Govt body hrang hranga Officer hna thawk tha lo leh hlep ruk chingte (non performing and corrupt officers) chanchin kimchang ziahna theh lut thuai turin a ti a, hei hi pension a chhuah luihtir an nih theihna tura hriattirna a ni.
The Department of Personnel and Training (DoPT) chuan (December 2, 2019) khan Ministry leh Govt bodies 40 zet hnenah lehkha pein hriattirna a ti chhuak. He lehkha hi ‘REMINDER IMMIDIATE’ ti a chhinchhiah a ni.
Hriattirna hmu zingah hian NITI Aayog, Ministry of Agriculture, Finance, Human Resources Development leh Law Department pawh an tel.
Department of Personnel & Training in a sawi dan chuan he an lehkha hi December 13, 2019 Zirtawpni emaw a aia hmaah emaw an chhanna theh lut vek tura hriattir an ni.
Department of Personnel & Training hian thla ruk vel kal tawh June thla khan Ministry zawng zawngah an hnuaia thawk Officer hlep ruk ching leh an hna thawk tha duh lo leh tangkai lo (deadwood) zawng zawngte chu pension luih tir an nih theihna turin an hming theh lut vek turin a lo hriattir tawh a.
He hriattirna DoPT atanga thawn chhuah hi Ministry leh Govt bodies hrang hrang atangin mihring hming theh luh hi tihkhawtlai leh bawhzui that a nih loh avangin hriattir nawn a ni.
SENIOR OFFICER DIM LO :
Ministry of Finance chuan June 11, 2019 khan Income Tax Department hnuaia thawh senior IRS 12 rualte chu thamna, hlep rukna, hausak lutuk leh chhan hrang hrang avangin Fundamental Rules (J) tlawh chhanin a ban luihtir.
Heng mite hma pawh hian Rule 56(J) hmang tho hian heng senior officer te hi um chhuah an ni tawh bawk. M. N Kumar (IAS), K. Narasimha (IAS), Mayank Sheel Chohan (IPS), Raj Kumar Dewangan. [News18, June 11, 2019]
SORKAR HRIAT DUH CHU :
DoPT atanga Ministry-te hnena lehkhathawn chhuahin hriat a duh chu, heng officer hminghliau leh rinhlelhkaite hian chawlh vawi engzat nge an lak tawh, an lakah eng ang hremna nge lekkawh a nih tawh tih te, an thawh chhungin an dinhmun en thlithlai a nih tawh dan bakah an hriselna a tha em tih te, chu chuan an hnain a tuar em tih te, hna thawk chhunzawm zel turin an la tangkai zel ang em, rintlakin an la thawk thei ang em tih bakah an in leh lo dinhmun kimchang te, danin a phal loh an nupui fanaute zingah sumdawng an awm em tih te, hre chiang vek turin a ti.
CORRUPTION IN HMUN A CHANG TUR A NI LO :
Narendra Modi kaihruai BJP leh a thawhpuiten kumin kum lai hawla General Election-a hnehna an chan hnu May 30, 2019 zan dar 7:00 a Rastrapati Bhavaan-a Prime Minister atan a vawihnihna atan Narendra Modi lak luh a nih hnua thu thar theh darhtute hnena a sawi hmasak zinga mi chu ram leh mipuite hmasawnna tak tak thlen turin corruption free a tul thu a sawi a nih kha. Hemi avang hian Modia Sorkar hian eirukna leh hlemhletna laka fihlim lova hriat officer te leh an hnaa tuina leh tangkaina nei lo, hna thawk tha peih lote chungah zahngaihna leh khawngaihna chhete mah lantir a tum loh avangin hengho hi a rang thei ang bera ram leh mipuite tan pawi an khawih zel theih lohna tura an chhuah theihna tura kawng zau taka hawnsak a ni nghal bawk.
Independence Day thuchah August 15, 2019 khan Prime Minister Narendra Modi hian a thusawi zingah corruption umbona tura Sorkar hma lakna hrang hrang a sawi nawn leh ngat a. “Kan Sorkar hmasa kum 5 chhungin Sorkar hnathawk nuam tawl tam tak kan bantir a, Sorkarin mipui rawng a bawlna kawnga corruption nuaibona tura mihring hnawksakte chu pawn lama theh chhuaha, an pawnthuah tel tir nghauh nghauh tur a ni, ram leh mipuite hian heng mite hna thawh hi kan mamawh lo,” Prime Minister Narendra Modi chuan a ti.
The Print
December 5, 2019