Modi-a vangin khawlai a fai deuh

Inrinni hian India ram prime minister Narendra Modi-a’n Mizoram a tlawh dawn a, hei vang hian tunlaiin Aizawl khawlai a fai ve deuh, ruihhlo lamah.
Aizawl khawlaiah duhtawkin heroin leh ruihhlo dangte pawh a lei theih a, hmun engemaw zatah zalen takin a ruih theih bawk. Tun kar erawh chutiang a ni lo.
Tun karah, kar hmasa tawp lam te pawh kha a ni tawh, khawlai a fai ve deuh a, ruihhlo leh a sulhnu a hma angin a langsar lo; hmuh tur chu a awm a, mahse a hma ang luih luih a ni lo.
Ruihhlo ti thinte chuan Modi-a a rawn zin dawn vangin police an duty ngawrh tih an sawi a, chhunah pawh zanah pawh police te’n khawlai an vil a, an hnawt darh thin tih an sawi.
“Tunlai chu police an duty nasa a, a hma ang a ni lo. Man chu min man lo a, haw turin min ti a. ‘Kan hmuh leh che u chuan kan khawm ang che u,’ min ti a,” tiin Vanapa Hall kawta ruihhlo chang mektu pakhat chuan a sawi.
Ruihhlo buaipuia khawlaia chhuak thin, hemi chungchanga biakpawhte chuan tunlaiin ruihhlo zuar an ti tih an sawi a, a hma anga duh hun huna lei tur a awm loh thu leh, lei tuma chhuakte pawh anti a, an fimkhur tihte an sawi.
Khawpui chhunga ruihhlo ti thinte kalkhawmna hmun hrang hrangah duh hun huna lak tur a awm rih lo tih an sawi rual hian, Rangvamualah erawh a hma ang bawk a nih thu, duh duha lak tur a awm thu an sawi.
Tun hnaiah ruihhlo man a pung hrim hrim tih an sawi a, Modi-a rawn kal tur boruak nen a innang a, an zalen loh bakah ruihhlo pawh neih mai a har tih an sawi.