Prime Minister Narendra Modi-a’n a tlawh hma lawkin Chinese Foreign Minister Wang Yi-a chuan Thawhtanni hian India a tlawh dawn a, National Security Advisor Ajit Doval-a nen an inkawm ang.
Modi-a’n China a tlawh tur hi kum nga kal taa Ladakh-a ram pahnih sipaite an intihbuai hnua a tlawh lehna hmasa ber tur niin kha thil thleng avang khan ram pahnih inkar hi a chhe hle a. Tunah hian Shanghai Cooperation Organisation (SCO) summit-a tel turin prime minister hi a zin dawn a ni.
Yi-a’n an rama Indian hruaitu a zin hma lawka India a tlawh tur hi US President Donald Trump-a’n Beijing leh Delhi laka tariff sang tak lak a tum mek lai a ni bawk a. American hruaitu hian Indian bungrua an lak luhah 50% tariff lak a tum a, hei hi Russian tuialhthei a lei avanga hrek nan 25% a tihsan dawn vang a ni.
Yi-a leh Doval-a hi June thla khan an lo inhmu tawh a, SCO chungchang pawh an lo sawi dun nual tawh.
India-China inkar hi rei tak tha lo mah se Trump-a’n tariff sang laksak a tum ve ve atangin an inhnimhnai hret a. US leh China hi tariff-ah an inbei nasa hle a, kum tirah khan Washington chuan 145% laksakin Beijing-in 125% a laksak ve bawk.
March thla khan US-in China laka tariff sang a lak tum hi tikhawtlaiin 20% chauh a la laksak rih a, Yi-a hian India leh China chu thawk duna ‘Washington-in sumdawnna thil a kalpui dan do let dun’ turin a sawm a ni.
National People’s Congress thutkhawm zawhah ‘dragon leh elephant lâm duntir chauh hi duhthlan tur dik a ni a… indo lova inpui tawnin, mahni inveng lova thawhhona tichakin, cu chu kan thatna tur a ni’ tih a sawi a ni.
Yi-a hian India-China inkar chuan kum liam ta atangin that lam a pan tih pawh a sawi a, Ladakh-a Depsang leh Demchok-a kum 2020-a an intihbuai hnuah an inhnaih zel tih a sawi.
A hnu lawkah Indian Foreign Minister S Jaishankar pawhin sorkarin inkungkaihna tha zawk a awm theihna tur a dap tih a sawi zui veleh a. Inpawhna atan China-in a thunun hmuna biakzin chhunzawm leh te, thlawhna inthlawhpawhtir leh bakah chanchinbumi inpawhtir pawh a tel.
China hian Modi-a’n a tlawh tur pawh an lawm hle a, India nena an inkar thatnain hma lam a pan zel niin an sawi a. Foreign ministry thupuangtu, Guo Jiakun-a chuan Tianjin-a August 31 leh September 1 inkara SCO summit lo awm tur chu a hlawk dawn tih a sawi a ni.
Modi-a hian Tianjin-ah hian Russian President Vladimir Putin-a leh Chinese President Xi Jinping-a te pawh a kawm ngei rin a ni.
Modi-a’n a tlawh hmain Chinese FM-in India tlawh dawn
