Indian Prime Minister Narendra Modi-a chuan Russian President Vladimir Putin-a hnenah Ukraine-a indona chu mihringte dinhmun avangin tihtawp a tul tih a hrilh a, inbeihna titawpa muanna a awm theih nana hmalakna chu New Delhi-in a thlawp tlat danw tih a sawi.
Kyrgyz khawpui, Bishkek-a Thawhtannia an inkawmnaah Modi-a hian Putin-a ‘ka thian’ tia kovin ram pahnihte eibara an inkungkaihna lawmawm a tih thu a hrilh a, hei hi ram pahniha mite hlawkpui tawnna tur thilin a kaihhruai a ni tih a sawi bawk.
China nen India hi Russian tuialhthei lei tam ram an ni a, hi hian Moscow-in kum 2022 atanga Ukraine a rûn mek avanga sipai thila hman tur leh khawthlang ramten an kawmserhna avanga harsatna a tawh phah theihna tur tam a chhawl ve thung.
“Thil thleng mekah hian i hriat tawh angin, India chuan muanna a awm theihna atana hmalakna hi kan thlawp a, chu chu nakin zela kan ngaihdan tur pawh a ni,” tiin Modi-a hian Shanghai Cooperation Organization (SCO) summit-a an inbiaknaah hian a hrilh tih Kremlin-in an inkawmna a tar lanah a puang.
“Ni tin indona a kal zel hian mihringten an tuar a, an hnungtawlh zel a, muanna a awmna atana rahbi tuk hian muanna a awm beiseina a siam a. Indona tawp thei lo hi indona titawp tura ke pen, boruak tihdaih a tul a. Chumi lam kawng zawh chu kan mamawh tawh a ni,” tiin Modi-a hian Ukraine-a muanna a awm a duh thu a sawi hmain a sawi bawk.
Russian sorkar chanchinbu chuan, “Ka lawm lutuk e, Prime Minister. Chu kawng zawh chuan thui tak kan kal mek a ni,” tiin Putin-a hian a chhang tih an tar lang.
Kremlin hian a hma pawhin anmahni duh dan anga indo titawp turin Russia chu a inring reng tih a lo sawi tawh thin a, Ukraine-in an thil phutte a pawmpui thei lo thung.
An inbiak zawhah Putin-a hian Modi-a hi sipai chakna hmanga beihpui an thlak dante pawh a hrilh a, Ukraine chetna an chhan letna leh hma an sawnna pawh a hrilh niin TASS news agency chuan a tar lang.
February, 2022 atangin Russia hian Ukraine hi a rûn a, inkahhai awm zeuh thin mah se tun thlengin indo tihtawp a la ni lo va. US leh ram dang pawhin a tawp theih nan hma an la nasa a; mahse, rah tha a la chhuah thei lo.
Tun hnaiah phei chuan ni tin van sang atangin an inkap a, an hmunhma pawimawh leh civil mite thil tam tak an intihchhiatsak a, mipui tawrhna pawh a nasa hle tawh a ni.
Modi-a’n indo tihtawp a tul thu Putin-a hrilh
