Middle East buainain hmun dang a kang kai zel dawn dawn nia ngaih theiha thil a inmun mek laiin Prime Minister Narendra Modi-a chuan Ningani khan France President Emmanuel Macron a bia a, buaina chungchang hi a sawipui.
Modi-a chuan Asia khawthlang lama thil awm dan inthlak danglam zel chungchanga Indo-French ngaihdan inhrilh leh inbiakna leh palai intirha kir leh a tul thu chu telephone-in Macron-a hi sawipui tih a sawi.
“Vawiin khan ka thianpa, President Emmanuel Macron nen kan inbia a, Asia khawthlanga thil awm dan danglam zel leh inbiakna leh palai intirh lama kir leh a tulzia kan sawi dun a, he biala remna leh muanna a awm hmasak theihna tura hmalaknaah kan tang dun tlat a, kan inthurual zel ang,” tiin X-ah a tar lang.
Prime Minister Modi-a hian Ningania Macron-a a biak hma hian sipai chakna nena buaina a chhuah tan atangin Asia khawthlang ram hruaitu pariat a be tawh a. Tun tuma French president nena phone-a an inbiak hi a hma ni chiaha Sri Lanka tuipui kama Iran lawng sipaite lawng a pil hnuah a ni a, he thil thleng hian Tehran-a buaina hian India a hnaih tan viau tih a tilang.
Lawng pilah hian a thawk mi 84 vel an thi a, dam chhuak 32 chu Sri Lanka thuneituten an chhanchhuak a. Lawng hi ni tam vak lo liam ta maiah khan international fleet review-a a tel hnuah India a chhuahsan a ni.
Asia khawthlang lama buaina chhuak hi Inrinnia US leh Israel tang dunin Iran laka beihpui an thlak atanga intan a ni a, Iranian Supreme Leader Ayatollah Ali Khamenei chu a ni khatnaah hian a thi nghe nghe.
Beih an tawh hnuah hian Iran chuan Gulf ram eng emaw zata Israel leh American sipai hmunpuiah beihpui a thlak zui ve nghal a. A beih zingah hian UAE, Bahrain, Kuwait, Jordan leh Saudi Arabia te pawh an tel.
Tun hnai ni eng emaw zat chhung khan buaina hian huang a zauh mek zel a, lehlam lehlam hi an inbei chhunzawm a, an inchhang zel a. US chuan Nilaini khan Sri Lanka tuipui kamah Iran lawng pil ta hi torpedo hmanga kapin a pil zui a ni.
Sri Lanka navy-te chuan zing dar 05:08-ah lawng atang hian puih an ngai tih thu an an dawng tih an sawi a, Iranian indo lawngah hian mi 180 an chuang a ni.
Iranian Foreign Minister Abbas Araghchi-a chuan he pawikhawihna hi a dem thu sawiin IRIS Dena hi ‘vaukhânna awm lovin’ kah a nih thu a sawi a. X-ah ‘US-in kut a thawh hmasa hi pawi a la ti hle ang’ tih a tar lang bawk.
Modi-a’n Middle East buaina Macron a sawipui
