Kumin December thlaa India leilunga rawn inkhel leh tur Argentine superstar Lionel Messi chuan hming ziah hnan thlap chungin 2022 World Cup trophy an lak tuma a jersey hak pakhat kha Prime Minister Narendra Modi piancham vawi 75-na herchhuak pualin a hlan!
Ruahman lawk ang chuan, kumin December ni 15 khian Prime Minister Narendra Modi chenna in New Delhi-ah Messi hi a leng dawn a, Messi lo zin tur ‘GOAT Tour of India 2025’ boruak siamna atan birthday present an inhlan ni berin a lang!
India leilunga Messi inkhelh theihna tura ruahmanna siamtu promoter Satadru Dutta chuan karliamta Nilaini khan football icon World Cup jersey chu PM hnena a hlan tur thu a puang a, Argentina captain nen an indawr dan sawi nghalin, “Kumin February thlaa kan inhmuh tum khan PM tlawh chungchang hi kan sawidun a, Modi-a piancham vawi 75-na a hnaih thu ka hrilh nghal a, ani chuan a hming a ziahna jersey chu Prime Minister hlan a duh thu min hrilh ve nghal a ni,” a ti.
Dutta sawi zel danin, India tour a kalpui laia Messi-a’n PM a hmuh theih dan tur a ngaihtuah thu leh India tour hi December ni 13 atanga intan tur a nih thu sawiin, Delhi baka an tumna tur khawpui dang pahnihte chu Kolkata leh Mumbai a nih thu a tarlang tel.
Football-mad city an tih mai, football atchilh ve tlat kumkhua Kolkata chu Messi tlawh hmasakber tur niin, West Bengal khawpui atang hian Mumbai leh New Delhi-ah ‘GOAT Tour of India 2025’ hi an kualpui leh dawn a ni.
Tarlan tak angin, he tour hi prime minister chenna inah a hmawr an bawk dawn a, chu’ngte a nih avangin Argentina captain hian world cup trophy a chawi tuma a jersey hak pakhat kha piancham lawmna’n Modi hi promoter Dutta kaltlangin a hlan ta a ni.
Tuntuma Argentine great lo zin tur hi kum 2011 hnu lama India a tlawh leh vawi khatna tur niin, kha mi tum khan Salt Lake Stadium, Kolkata-ah Argentina leh Venezuela-te’n FIFA friendly match an khel a, Kolkata mipuiin mit lawngin Messi inkhel an lo thlirliam tawh a ni!
India leilunga Messi lo inkhelh leh theihna kawng daptu Dutta hian kumin kumtir lam khan a rawtna neihte thlen turin Messi pa a hmu phawt a, a hnu, February ni 28 khan a chenna in ngeiah Messi tlawhchhuakin India tour chungchang hi minute 45 chhung an sawi dun a, an inhmin thei ta a ni.
Tuntuma India a lo tlawh turah hian programme pawh an duang duhthawh viau a ni.
Thla hmasa mai khan Kerala Sports Minister V. Abdurahiman pawhin an star player Messi ngei telna Argentina football team-in Kerala an tlawh tur thu leh kumin November thla hian an state chhunga friendly match an khelh tur thu a lo nemnghet ve tawh bawk a nih kha.
Argentina Football Association (AFA)-in an manager Lionel Scaloni hoa national team-in Angola khawpui Luanda leh Kerala-a friendly match an khelh tur thu an puan hnu lawkah Abdurahiman hian an state chhungah reporter rual hmachhawnin Messi telna Argentina team an mikhual tur thu a sawi.
Modi hnena special b’day gift thawntu Messi!
