Mohun Bagan icon Habib a thi

Kum 1970 bawr chhoa Mohun Bagan playmaker ropui ni thin Mohammed Habib kha kum 74 mi niin tunkar Thawhlehni khan a pianna Hyderabad khuaah a thi.
Bagan thuam inbel chunga Pele club vawn lai New York Cosmos laka goal lo khung ve ngat tawh India player hlui Habib hi tunhnai kum hnih vel chhung kha dementia leh Parkinson’s syndrome natna hmanga enkawl niin, a nupui leh a fanute pathum a kalsan ta a ni.
Bangkok khawpuia 1970 Asian Games-ah khan captain ni chungin India mipa football team kha bronze medal a lakpui a; kum 1960 bawr chho tir lam atanga 70s thlengin Mecca of Indian football an tih mai Kolkata khawpuia footballer langsarberte zingah a tel.
Hyderabadi Habib hi July 17, 1949 khan piangin, India captain hlui hian ram tan game 35ah goal 11 a thun a; kum 1967 Kuala Lum-pur Merdeka Cup-a Thailand a hmachhawn kha ram tana a inlan vawikhatna a ni.
Football khelh a chawlhsan hnuin Tata Football Academy (TFA)-ah coaching a luhchilh a, Haldia khuaa Indian Football Asso-ciation academy-ah chief coach hna a chelh bawk.
A career-a a goal thun chhinchhiahthlak pakhat chu Kolkata khawpuia Eden Gardens tuihawk tling hnuaia Pele telna team laka a goal khung kha a ni.
Kum 1977 khan Brazil legend Pele khelhna Cosmos Club chuan Mohan Bagan tlawhin friendly match an khel a; mikhual team-ah khan Pele bakah hming hraw dang Carlos Alberto, Georgio Chinaglia leh midang an kat nuk a, chuti chungin Kolkata giants khan 2-2 draw an neihpui a, midfield-a Bagan innghahna lian chu Habib a ni.
Inkhelh banah Pele hian Habib fakna tawngkam a chhakchhuak nghe nghe.
Asian Games bronze medal a lakpui bakah Habib hian kum 1971 khan Sukan Cup-ah Blue Tigers chu South Vietnam nen joint winners a nihpui a, he tournament-ah hian South Vietnam nen champion-a puan ve ve an ni!
Club level-ah Habib hian kum 1966 khan Hyderabad chhuahsanin Kolkata a pan a, he khawpuiah hian East Bengal zawmin, a hnu season 18 chhungin Kolkata club lian pathum tan a khel kim vek a, Indian football legend zinga chhiartel a ni.
Kolkata club lian leh inhal pahnih East Bengal leh Mohun Bagan tana khel ve ve thei player langsar zinga pakhat Habib hi Triple Crown an tih mai, season khat chhunga Indian club-te trophy lak theih pathum – IFA Shield, Durand Cup leh Rovers Cup hawn thei player tlemte zinga mi a ni.
Kum 1972 khan East Bengal thuam inbel chungin Triple Crown a hlawhchhuak a, kum 1977-ah Mohun Bagan player ni chungin he’ng trophy lian pathum hi season khat chhungin a hui leh bawk.
Kum 1975 thlenga international football khel Habib hian football tana a thawhhlawk avangin India rama chawimawina sang Arjuna Award a dawng nghe nghe.
All India Football Federation (AIFF) president Kalyan Chaubey leh secretary general Shaji Prabhakaran-te’n Habib uina thuziak an tarchhuak.