Morgan Wallen ‘Last Night’ a No.1 leh ta

Morgan Wallen ‘Last Night’ a No.1 leh ta
Morgan Wallen hla hit ‘Last Night’ chu Billboard Hot 100 (singles) chart-ah No.1 atangin han tawlh ve zuai mah se a rawn kir leh nge nge thin, tunkar chart-ah pawh No.1 a rawn kai thar leh ta a, he chart-ah hian a zawn ni kher lovin kar 15 a No.1 tling ta a, Travis Scott album ‘Utopia’ a hla pahnih chu top 5-ah an lang ve nghal thawt bawk.
Billboard Hot 100 chart hi kar khat chhunga US-a hla lar dan tehna a ni a, chart ranking siam nan hian all-genre US streaming (official audio leh official video), radio airplay leh sales data te chu tehna pawimawha ni.
Morgan Wallen ‘Last Night’ hian radio airplay-ah ngaithlatu maktaduai 67.2 a la nei thei a, streaming-ah pawh maktaduai 26.7 a la tling a, sales 7,000 a tling bawk a, hei hi chart-ah No.2 atangin No.1 a kaipui leh ta a ni.
Morgan Wallen ‘Last Night’ hian he chart-a hla No.1 ni rei thei palina a rawn nihrual ta a, hetih hian midang zaipui nei miah loah chuan he chart-a hla No.1 ni rei thei ber, Harry Styles ‘As It Was’ record a nih rual ve thung. He chart-a hla No.1 ni rei thei ber chu Lil Nas X feat. Billy Ray Cyrus ‘Old Town Road’ kha niin, kar 19 a No.1 thei a, a dawttu chu Mariah Carey leh Boyz II Men ‘One Sweet Day’ leh Luis Fonsi & Daddy Yankee feat Justin Bieber ‘Despacito’ niin, kar 16 an No.1 thei ve ve a, pathumna chu kar 15 No.1 thei Harry Styles ‘As It Was’ leh Morgan Wallen ‘Last Night’ te an ni.
Luke Combs-a’n Tracy Chapman hla hlui a cover ‘Fast Car’ No.3 atangin No.2 a kai thar leh a, Travis Scott album thar ‘Utopia’ atangin a hla ‘Meltdown’ featruing Drake chu stream maktaduai 32.2 tlingin No.3 a ni a, ‘FE!N’ featuring Playboi Carti chu stream maktaduai 25.6 tlingin No.5 a ni bawk. Travis Scott hian Hot 100 chart top 10-a lang thei hla 14 a nei tling ta a, PlayboiCarti tan a pahnihna niin, Drake tan a 69-na a ni ve thung.
Drake hi he chart top 10-a lang thei hla ngah ber niin, Taylor Swift (42), Madonna (38), The Beatles (34), Rihanna (32), Michael Jackson (30), Elton John (29), Mariah Charey (28), Stevie Wonder (28) leh Janet Jackson (27) ten an dawt.
Taylor Swift ‘Cruel Summer’ chu No.6 atangin No.4-ah a insawn a, he hla hi 2019-a a album ‘Lover’ ami kha niin, kum li hnuah chart top 5-ah a lang ta a ni.Swift hian he chart top 5-a lang thei hla 27 a nei tling ta a, he chart top 5-a lang thei hla ngahah palina record a nih rual ta a ni.
Billboard Hot 100 chart top 5-a lang thei hla ngah ber chu Drake niin, hla 36 a nei a, The Beatles (29), Madonna (28), Mariah Carey (27), Taylor Swift (27), Janet Jackson (24), Rihanna (24), Elvis Presley (21), Justin Bieber (20), Michael Jackson (20) leh Stevie Wonder (20) ten an dawt.
Rema leh Selena Gomez ‘Calm Down’ chu No.5 atangin No.6-ah a tawlh a, Gunna ‘Fukumean’ chu No.4 atangin No.7-ah a tawlh a, Nicki Minaj, Ice Spice leh Aqua ‘Barbie World’ chu No.8-ah bawk a la awm a, chart No.1 hlui Olivia Rodrigo ‘Vampire’ chu No.10 atangin No.9-ah a insawn leh ta bawk.
Chart top 10 khartu chu Dua Lipa ‘Dance the Night’ niin, radio airplay maktaduai 42.3, stream maktaduai 15.3 leh sales 6,000 tlingin No.12 atangin No.10-ah invawrh kai ta. Dua Lipa hian he chart top 10-a lang thei hla panga a nei tling ta a ni.