Congress te chuan Prime Minister Narendra Modi chu na taka beiin nikum May thlaa Manipur buai hnuah Rahul Gandhi-an tum thum a tlawh tawh laiin PM chuan darkar rei lo te tak ngial pawh tlawh zuai tur pawhin hun a nei lo an ti.
Congress general secretary Jairam Ramesh chuan, “Vawiinah non-biological PM chuan Moscow a pan a, chutih laiin Lok Sabha a Leader of Opposition chuan Assam leh Manipur a pan thung. Non-biological PM drumbeater ho chuan Russia-Ukraine indona hun eng emawti chen a titawp an ti hial a. Tuna Moscow a tlawh hnuah chung aia mak chu thlentir leh angin an tlangthantir leh ang,” tiin a sawi.
“Tun hi Rahul Gandhi-an thla sawm pali kaltaa Manipur buai atanga a tlawh tum thumna a ni tawh” tiin Ramesh chuan a sawi bawk a.
“Non-bilogical PM hi May 3, 2023 a Manipur buaina chhuah hnuah darkar rei lo te tal tlawh tur pawhin hun a nei lo va, tumna pawh a nei lo” tiin a sawi bawk.
“Manipur Chief Minister an party mi leh sa ngei leh Manipur state political leader MLA leh MP te pawh a la hmu miah lo bawk” tiin Ramesh chuan a sawi bawk.
Modi chuan President Vladimir Putin sawmna chhangin July 8 leh 9 ah 22nd India-Russia Annual Summit hmang turin Moscow a tlawh a. Rahul Gandhi thung chuan Delhi atangin thlawhnaa Silchar panin chumi hnuah June 6 a buaina chhuahna hmun Jiribam district a pan leh thung.
Imphal a thlen hnuah Churachandpur district pan zui dawnin chutah chuan relief camp-a awm te nena inkawmhona an nei ang.
Churachandpur atangin Congress leader chuan Bishnupur district-a Moirang chu pan lehin relief camp a tlawh leh ang a. Chumi hnuah Imphal-ah let lehin Governor Anusuiya Uikey nena inkawmna an nei dawn a ni. Gandhi hian June 2023 khan Manipur tlawh tawhin kumin kumtir lama Bharat Jodo Nyay Yatra bultannaah a tlawh bawk.
18th Lok Sabha first session kar kalta a neiha President address Motion of Thanks neihnaah Rahul Gandhi chuan BJP sorkar chu an policy leh politics hmanga Manipur a ‘civil war’ thlenah a puh a ni.
Congress leader chuan Prime Minister Modi pawh Manipur-a buaina chhuah hnu atanga a la tlawh miah loh avangin a sawisel bawk a.
Gandhi chuan Centre a BJP sorkar chuan Manipur-ah eng buaina mah awm lo ang chiahin an awm ti bawkin, “Manipur-ah civil war in chhuah tir a. In policy leh politics hmangin Manipur in hal mek a ni,” tiin a sawi.
President address Motion of Thanks chhanna Rajya Sabha a neihah Prime Minister Modi chuan Centre chuan State sorkar nen Manipur-a remna leh muanna a awm theih nan hma an la reng a ti thung a.
Manipur buaina kaihhnawihah mi 500 chuang man ni tawhin FIR 11,000 chuang ziah luh a ni tawh a ti bawk a. Modi chuan Manipur chuan tuilian tawk bawkin Centre chuan National Disaster Response Force team hnih a tirlut a ni, a ti bawk.
Moscow tlawh mek Modi sawisel
