MotoGP season kal laia Bezzecchi chak vawi hnihna

MotoGP season kal laia
Bezzecchi chak vawi hnihna
MotoGP season kal laiah thla hmasa mai khan Marc Marquez chuan Japan ramah a career-a a tum sarihna atan MotoGP title la fel tawhin, a hnua a chetsualna avangin a season a zo fel tawh a, Pathianni Portuguese Grand Prix-ah pawh a inlan thei lo a, world champion bike theih loh hlawkpuiin Italian rider Marco Bezzecchi chuan hnehna a chang a, season kal laia Aprilia rider-in lawmman semna dawhsan chungber a luah vawi hnihna a ni ta.
Kum 26-a upa Bezzecchi hian kumin May thla khan Silverstone tlankawngah hnehna chang tawhin, tun season-a intlansiak hnuhnungber dawttuah pakhatna dinhmun a luah leh tak avangin pathumna ni chunga championship khar thei turin beiseina a nei chhunzawm zel.
2025 MotoGP World Championship standing-ah Italian Bezzecchi hian pahnihna luah mekin, a chungah champion fel tawh Ducati rider Marc Marquez leh runner-up ni nghet ve tawh bawk Gresini Racing rider Alex Marquez an awm.
Pathianni Portimao tlankawnga Portuguese MotoGP-ah khan bike intlansiak level pathum – Moto3, Moto2 leh MotoGP-a hnehna chang kim vek tawh polesitter Marco Bezzecchi hian a tir atanga a tawp rat thlengin hma a hruai tluanchhuak parh a, Inrinni sprint race-a pathumna a nih phak chauh boruak nen chuan a inang lo ta hle a ni.
Portugal ramah khan pahnihna chu Gresini Racing rider Alex niin, pathumnaah KTM rider Pedro Acosta a thleng.
MotoGP season tawp hnaih lamah rider ngai an chak zawn mawh hle a, Pathiannia Bezzecchi hnehna kha race hnuhnung vawi ruka rider hrang thiau paruk an chakna chiah a ni!
Championship-a Bezzecchi nena pathumna dinhmun inchuh mek Ducati khalhtu Francesco Bagnaia chu Pathianni race-ah tlanchhuak zo lo zawngin a han khawsa leh rih a, Valencia lama final round an tlan hmain Bezzecchi lakah point 35 laiin a hnufual ta.
MotoGP rider-te’n Grand Prix vawi khata point an hmuh san theih ber chu point 37 niin, chu mi awmzia chu Inrinni chawhnu sprint race-a chakin point 12 an hmu a, Pathianni race tak taka chakin point 25 an rut leh a, rider pakhatin Inrinni leh Pathianni race-a hnehna a chan ve ve chuan belhkhawmin point 37 a hlawhchhuak thei tihna a ni.
Spain rama season kharna intlansiakah hian Ducati rider Bagnaia hi sprint leh a tuk race-ah chak ve ve pawh ni se pathumna dinhmun luah tura a elpui Marco Bezzecchi result-in pathumna ni chunga season khar tur chu a la hril cheu dawn a ni.
2025 Portuguese MotoGP kha season kal laia intlansiak tum 21-na niin, tunkar tawp November ni 14-16 hian Circuit Ricardo Tormo Circuito de la Comunitat Valenciana tlankawngah 2025 Valencia MotoGP hmangin season an khar tawh dawn a ni.