Mount Everest-a vawi khat lawn chhuah pawh a hautak tehreng nen, Pathianni kalta khan Everest-ah hian record pahnih an siam am Nepali sherpa, Kami Rita Sherpa, kum 54, chian a vawi 29 nan Everest a lawn chhuak a, Moutn Everest chhip lawn chhuak ngun ber record a siam a, British tlang lawnmi Kenton Cool pawhin a vawi 18 nan a lawn chhuak ve bawk a, Kenton hi foreigner zinga he tlang lawn chhuak ngun ber a ni ve thung.
Kami Rita Sherpa hi he record siamtu ni lai niin, a record a sawhnghet leh ta sauh a ni. Tlawnglawn mi te lo aihruai thintu, Kami Rita Sherpa hian a vawi khat nan 1994 khan Everest chhip a lawn chhuak a, chuta tang chuan kumtin deuhthaw he tlang chhip hi a lawn chhuak ta ziah a ni.
Mount Everest hi a climbing season a intan deuh chiah a, tun thla chhung hian mi za telin lawn chhuah an tum leh ngei dawn. Sherpa hian meter 8,849 (feet 29,000) a sang, Everest chhip hi Pathianni kalta zing dar 7:30 khan a vawi 29 nan a lawn chhuak ta chiah a ni.
Nikum khan Kami Rita Sherpa hian Everest hi vawi hnih a lawn chhuak a, a record khumtu Pasang Dawa Sherpa a lehpel leh ta chiah a, tunah a record a sawhnghet lehzual ta a ni.
Kenton Cool pawh hi tlanglawn mite kaihruaitu a ni ve tho a, 2022 khan a vawi 16 nan Everest chhip a chuan a, nikum khan vawi khat lawn chhuak lehin, Pathianni kalta khan a lawn chhuak leh a, tihian vawi 18 lawn chhuakin Nepali sherpa ni lo, ramdangmi zinga he tlang lawn chhuak ngun ber a ni ta a ni.
Nepal sorkar hian kumin spring season atan Everest lawn phalna hi tlang lawn mi 400 vel hnenah a pe chuak tawh a, spring season hi April-June a ni. Tlanglawn mi zawng zawng deuhthaw hian anmahni kaihruaitu local guide, sherpa an tih mai te an nei thin a ni. Nikum khan mi 600 chuang Everest chhip-ah hian an lawn chhuak a, mi 18-in an nunna an chan phah bawk a ni.
Hmeichhe lama he tlang lawn chhuak ngun ber chu Lhakpa Sherpa niin, 2022 khan a vawi 10 nan Everest chhip a thleng a ni.
Mount Everest lawn chhuak ngun record siam
![](https://theaizawlpost.org/wp-content/uploads/Clipboard01-966.jpg)