Madhya Pradesh a thingtlang khaw pakhat Vedpuri a cheng, tribal loneitu, Sakharam Kirade, kum 57, sam (dreadlock) chu feet 10 leh inches 8 a sei a ni a, Guinness World Record, dreadlock sei ber siam theih inbeiseiin a buapui ve ta a ni.
Sakharam hian kum 41 chhung zet a lu a met tawh lo. Kum 16 a tlin hmain a lu vawi thum a met niin a sawi a, a rawn to leh chu a nalh deuh tawh a beisei thin. Mahse, chutiang a ni lo, a lu a meh a piangin a sam rawn to leh chu a hma aiin a kir lehzual sawt thin a. 1985 atang khan a lu a met leh ta miah lo niin a sawi.
Tunah hian dreadlock sei ber, Guinness World Record siamtu chu Alia Nasyrova a ni a, a dreadlock chu feet 8 leh inches 5.3 a sei a ni a, hei hi Sakharam hian a khum tih chu a hriat sa a, mahse, Guinness lamin official taka an teh sak a an pawmpui ve phawt a la ngai dawn a ni.
Sakharam te chu an chhungkua member 18 an la khawsaho vek a, fapa pali neiin, a mo leh a tute nen in khatah an la awm khawm vek a. A sam chuan world record a siam theih ngei a ring a, mahse, hma lak dan tur a hriat loh avangin a fapa-in an district thuneitute leh department lam chu Guinness World Record siamna kawnga pui turin a dawr a, tunah chuan document leh evidence te nen Guinness lam hi an be pawp tawh a ni.
Kirade sam hi a enkawl pawh a buaithlak dawn tih a chiang reng mai a, thla khatah vawi hnih a su fai thin a, a lu suk dawn chuan chhungkaw member hrang hrangin an pui thin. A lu suk zawh hlim, a sam ro chian hma chuan kg 15 a rit te a ni thin a, a sam ro hnuah kg 8 vela rit a ni bawk. A lu suk chhung pawh a rei a, a lo berah darkar thum tal an hmang thin a, a tihro leh nen darkar 12 vel a ngai bawk thin!
MP-a loneitu-in sam sei record a beisei
