MLA inthlanpuiah Mizoram mipuiin enchhin huam an thlang tawh a, Lok Sabha inthlanpui neih tur erawh enchhin chi a ni ve loa, ram leh hnam tana huaisen taka lo ding tawh thin K Vanlalvena kan vote tlin a ngai tih MNF president Zoramthanga chuan a sawi.
Champhai, Khawzawl leh Kawlkulh lama MP inthanpui atana campaign-a chhuak MNF president chuan 2023 MLA inthlanpuiah Zoram mipui thutlukna an pawm thlap tih a sawi a. MNF ni lo Congress nilo sawrkar mipuiin kan piantir tawh a, tunah chuan Delhi tlanga Mizoram aiawh tur kan thlang dawn, tiin, “Hei hi chu a dang daih tih mipuiin kan hriat a ngai. Central-ah BJP sawrkar a din a rinawm leh hle a. BJP sawrkar a ding leh a nih phei chuan MP huaisen, ram leh hnam hmangaih Pu K Vanlalvena ang kan mamawhna a sang hle dawn,” a ti.
MP chu enchhina thlan chi a ni ve loa, pi leh pu nei nei tha phei chu thlan chi a ni lo tih Zoramthanga hian a sawi a. Helaia pi leh pu neih thatin Parliament-ah awmzia a nei lo tih mipuiin hre nawn turin a ngen tih a sawi bawk.
“Tunhmain Mizoramin ‘MP ngawi reng’ kan nei thin a, an lar loin mipui pawhin kan ngaihven em em hran lo. Amaherawhchu, kum 2022 a lo her chhuah meuh chuan, MNF-in Rajya Sabha member atan Pu K Vanlalvena kan thlang chhuak a. Mizoramin hun rei tak ata ‘MP ngawi reng’ kan lo neih tawh thin chu rawn sawi danglam dawrhin Mizoram mipui aiawh a nih zia a rawn pholang a. Mizoram tan a huaisen zia leh he hnam a hmangaih zia hi Delhi tlangah an tlangaupui ta piap piap a. Vawiinah chuan thangtharten a huaisenna leh ram a hmangaih zia kan sawi ta sup sup a. ‘Mizoram Mipui MP’ tia koh a lo ni ta hial a ni,” a ti.
Mizoram MP awm tawhah K Vanlalvena tluka mipuiin an thlamuanpui an awm lo tih MNF hruaitu hian sawiin, an MP candidate chu fak hranpa ngailo leh mipuiin an hmelhriat sa, Assam ramri buaia an thlamuanpui, CAB leh UCC do hlawhtlingtu, Manipur raltlan leh Myanmar raltlante tan Parliament-a huaisen taka auchhuak a, Mizoram tan a theihtawp takmeuh chhuahtu chu mipuiin kan thlamuanpui danah a langchiang hle, tiin a sawi. “Pathian ring ngamin thalaite khawvel thar siam tur leh Delhi tlanga Mizoram tana hna thawk thei tur, kan hriatchian sa Pu K Vanlalvena vote theuh ang u, tiin mipui ka sawm a ni,” a ti.
MP chu enchhin chi a ni ve lo – Zoramthanga
