MP inthlan hunah venhim uluk zual ngai polling station 21 awm

Mizorama Lok Sabha inthlanpui neih hunah venhim uluk zual ngai, critical polling station 21 a awm.State Election department hotute sawi danin, MP inthlan hunah hian state ramri bulhnai deuha polling station thenkhat leh tunhnaia state chhung inthlana thil thleng avanga venhimna tih uluk ngai deuh nia hriat chu ‘critical polling station’ ah hian dah a ni.
Assam nena inrina, Kolasib district-a Kolasib Assembly bial ami, polling station pakhat leh Serlui Assembly biala polling station 6; Manipur nena inhnaihna lam – Aizawl district-a Tuivawl Assembly biala polling station 3, Saitual district-a Chalfilh Assembly bial ami polling station 3 leh Lengteng Assembly biala polling station 2; Myanmar nena inhnaih – Champhai district-a Champhai South leh East Tuipui Assembly biala polling station 2 ve ve chu venhim uluk zual ngai zingah hian an tel.
Hei bakah hian Lawngtlai district Tuichawng Assembly biala polling station 2 – Rengkashya leh Lokisury chu venhim uluk zual ngaia puan a ni a. Nikum April thlaa Chakma Autonomous District Council inthlan campaign lai khan Rengkashya MDC biala ding tur, BJP candidate Amit Kumar Chakma chu Lokisuri khuaah mi engemawzatin kut thlak rawnin, a hnu lawkah a hliam tuar loin a thi zui a, hei vang hian tun tum inthlan turah pawh venhim ngai bik zingah a tel phah a ni
Hetihlai hian MP inthlan turah hian Mizorama polling station 9 chu lirthei luh lohna, polling party tan kea pan ngai a ni a. Mamit district-a Mamit Assembly bialah PS 2, Hachhek Assembly bialah PS 3 leh Dampa Assembly bialah PS 1 a ni. Lunglei district-a Lunglei South leh Thorang Assembly biala PS pakhat ve ve bakah Lawngtlai district-a Lawngtlai West Assembly bialah PS pakhat a awm bawk.
Lawng hmanga tlawhpawh ngai polling station a awm leh a, a vaiin PS 14 a ni. Mamit district-a Mamit Assembly bialah PS 2, Lunglei district-a Thorang Assembly bialah PS 4 leh West Tuipui Assembly biala PS 6, Lawngtlai district-a Tuichawng leh Lawngtlai West Assembly biala PS pakhat ve ve a ni.
April 19-a Mizorama Lok Sabha member thlan turah hian venhim hna thawk turin state police 3000 chuang leh central armed police forces (CAPF) company 15 vel an duty dawn a ni.