Lok Sabha member inthlan thawh khatnaa vote thlak tur zingah Mizoram pawh telin April 19-ah vote thlak a ni a. Mizoram Police zingah duty tura tirhchhuah an nih avanga vote thlak ve thei ta lo sang chuang an awm.
Thudawn danin, vote thlak ve ta lo te hi Mizoram pawna inthlan duty-a chhuak an ni a, state dang chuan duty tura chhuah hma in engkim tihfel ngai tia vote an thlak fel vek hnua an chhuahtir laiin, Mizoram Police bik hi vote an thlak ve theih dan tur ruahman fel a nih hmaa tirhchhuah an ni.
Election Commission of India-in dan thar a duang a, tunhmaa police leh midang, vote an neihna hmun ni loa inthlan duty-a chhuah ngaite tana postal ballot hmanga vote thlak theih mai thin chu titawpin, duty-a chhuak turten an chhuah hmaa vote an thlak theihna tur Falicitation Centre ruahman a ni a. Tun tum Lok Sabha inthlanah khan Falicitation Centre ruahman fel chu sawi loh, candidate la hriat kim hma, ballot paper siam theih hma in Mizoram Police zinga state pawna duty turte hi chhuah tir an ni.
Hetianga vote thlak tura an inpeih hma chuan, inthlan duty tura chhuah tir loh awm tak a nih laiin, state pawna duty turin Mizoram Police sang chuang chu inthlan thawhkhatnaa duty turin chhuahtir an ni a, postal ballot hmanga vote thlak phalsak an nih tawh bawk si loh avangin lungawilo an tam hle tih thu dawn a ni.
Inthlan duty tura thu petu ber hi sawrkar laipuia Home ministry a ni a, Mizoramah chuan chief electoral officer office kaltlang loin Home/ Police department-in a lo dawng a, hetiang hian ruahmanna siam a ni ta nia hriat a ni.
MP inthlana duty vanga vote thlak ve lo police sang chuang
