Daily Newspaper

MP K Vena’n a case chungchang la hre lo

8

Mizoram leh Assam inhmuhthiam loh chungchanga Assam Police te’n case an pek, Mizoram MP K Vanlalvena chuan a case chungchangah hriat a la nei lo a, Assam lamin an tilar hluai tak na a, a case neitu berin a case chungchangah thu dawn pawh a la nei lo.

“A awmzia ka pawh ka hre lo a, case min pek chungchang hi social media atangin ka lo hria a, a bak engmah thu dawn ka nei lo,” tiin Rajya Sabha MP K Vena chuan The Aizawl Post a hrilh.

July ni 26-a state pahnih police te’n silai an hmeh puah hnuah Assam chief minister-in Mizoram hnaihah commando 4000 kan dah dawn tiin a sawi a, Delhi-ah thuthar lakhawmtute K Vena kawma hemi chungchang an zawhna chu ‘An rawn kal leh a nih chuan kan lo tingmit dial ang,’ tiin a lo chhang a ni. Chumi chungchangah chuan Assam Police te’n case an ziaklut a, Dholai Police Station-ah case hi an ziaklut.

Chutiang a nih laiin K Vena hian Assam Police te atanga thu hriat a la nei lo a, August ni 1-ah Dholai Police Station-a inlan turin an ti tih, social media lam atangin a hre chauh.

Kar liam ta Zirtawpni, July ni 30 khan Assam Police hotute chu Delhi-a Mizoram House-ah kalin K Vanlalvena an hmuh duh thu an sawi a, a lo dawngsawngtu House hotute’n hetah a chen loh thu leh a chenna hmuna kal tura an lo tihin, ‘A chenna inah kan kal a, a lo awm lo a,’ tiin an chhang.

Hemi chungchangah hian K Vena chuan a chenna inah an rawn kal dawn tih a hriat loh thu a sawi a, a awm loh laiin Assam Police hi a chenna inah hian an lo kal ngei a, a kawngkharah police station-a inlan tura kohna lehkha an tar tih chu a hriat dan a nih thu a sawi. A kawngkhara lehkha tar pawh chu a tartute chuan a thlalain social media-ah an thehdarh a, chu chu a hmuh ve thu leh, kawngkhara intar lehkha chu a hmuh ve chuan loh thu, social media-a thlalak an thehdarh chu a hmuh a nih mai thu a sawi.

Tunlai hian Parliament-ah session an nei mek a, mahse an inauhbuai nasat avangin ro an rel thei lo. Ni khatah vawi thum vawi li te rorel inkhawm an titawp (adjourn) thin tih sawiin K Vena chuan, “Session hi a kal tluang thei lo a, tluang ila chu ramri chungchanga kan buaina hi sawichhuah ka duh a, mahse zero hour pawh a awm thei lo a, a tihngaihna a awm lo,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy