Daily Newspaper

MP Ronald Sapa’n inthlahna hun hmang

17

Rajya Sabha MP atanga chawl tawh tur Ronald Sapa Tlau chu Zirtawpni khan Aizawl Press Club-ah lengin Mizoram Journalists’ Association member-te nen an inkawm.

MP a nihna leh Parliamentary Committee-a a tel ve na te a thiam ang tawkin Mizoram tan a hmang ve tih Ronald Sapa Tlau hian sawiin, medical college tihpuitlinna kawngah te, Thenzawla Golf Course siamnaah te sawrkar laipui leh a pawnlama haichhuah ngai leh sutkuak ngaite chu theihtawpin a beih ve thu te; Aizawl khawpui lirthei tawt lutuk tihziaawmna tura ruahmanna, Mizoram sawrkar remtihnaa hma a lakna erawh a buaipuitute duh dan leh sawrlar duhdan a inan loh avanga a hlawhtlinna a hmu hman ta lo chu a ui thu te a sawi a ni.

MP a nih chhungin, Parliament House chhung leh pawnah pawh, Hindi thiam pawimawhna a hmuchiang hle tih sawiin, ” Parliamentarian tha leh chak ni tur chuan Hindi leh Sap tawng nal taka thiam a pawimawh em em tih hi ka thil zirchhuah a ni,” tiin, amah pawh Hindi thiam lo a nih avangin duh ang taka chet leh hma lak har chang a awm nia a hmuh thu te, chutihlaiin hnamdang MP zingah kawlhrawn leh chuhhelh thiam ve a ngaih ziate a sawi bawk.

Mizoram aiawha Rajya Sabha-a thu tur Pu K Vanlalvena chu duhsakna a hlan tih sawiin, MP a nih ve chhunga Mizo mipui duhsakna leh thlawpna chungah lawmthu a sawi tih a sawi a ni.

MJA Gen. Hqrs. president Zonunsanga Khiangte chuan Pu Ronald Sapa Tlau chu MP zingah an term chelh chhunga press mite huikhawm tam ber ala ni, tia sawiin, “Hemi hlawkna teltu chu mipui leh sawrkar an ni. MP awm leh zel tur ten entawn chhunzawm thei se a duhawm hle,” a ti. FCI Consulatitive Committee chairman a nihna avang pawhin press mite leh mipuiten FCI leh an hnathawh phung hrang hrang an hriatchian phah hle nia sawiin, Pu Ronald Sapa Tlau chu Mizo mipuite duh loh Citizenship Amendment Bill dodalnaah pawh Parliament chhung leh pawna aupui nasa tak a ni tih hretute kan ni, tiin a sawi bawk.

Mizoram-in MP engemawzat a neih ve tawh zingah an term tawp dawna journalist-te nena hun hman ho duha lenglut awmchhun a ni chu lawmawm an tiin an ngaihlu hle tih thu MJA president hian a sawi a. MP a nih chhunga MJA-te tana a hnathawh leh hmalakna hrang hrangah an lawm tih a sawi a ni.

Ronald Sapa Tlau hi Mizorama Congress party sawrkar lai, kum 2014 khan Mizoram Legislative Assembly member-ten Rajya Sabha MP tur an thlanah Indian National Congress candidate niin vote 40 awmah vote 34 hmu in a tling a. Kum 6 term RS MP hi vawiin – July 18, 2020 hian a hmang zo dawn chiah a ni. MP a nih chhung hian Parliamentary Committee on Health and Family Welfare-ah member a ni a. Mizoram State Consultative Committee on FCI chairman a ni bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy