Congress leader Adhir Ranjan Chowdhury chuan Parliament building hawn thar nia lawmaker-te hnena Constitution preamble copy sorkarin a pekah “secular” leh “socialist” tih a tel lo tiin a sawi.
Hei hi chhang letin Law Minister Arjun Ram meghwal chuan Preamble of the Constitution an sem chhuah chu original version a ni a ti a, secular leh socialist-te chu a hnua constitutional amendment neiha telh chauh a ni a ti a. “Hei hi chu original Preamble a ni a. A hnuah Amendment siam a ni” tiin a sawi thung.
Chowdhury thung chuan fing takin BJP sorkar chuan secular leh socialist tih chu an paih zawk a ni tia sawiin, BJP sorkarin tihpalh ni hauh lova a tihluih liau liau a ni a ti thung.
“Preamble of the Constitution copy building thar kan thehluhah secular leh socialist tih a tel lo. Fing taka paihin a awm a, thil serious tak niin kan aupui dawn” tiin a sawi.
Chowdhury chuan secular leh socialist tih chu kum 1976 a constitution a telh chauh a ni tihte chu an hriat thu a sawi a. “Kei chuan ka ngai thutak takzet a. An rilru leh an tum hi a chiangin ka hria” tiin a sawi bawk.
Lok Sabha-a Congress Leader ni mek chuan tu emaw Constitution copy pe dawn la, tuna version thar ber chu i pe mai dawn lo em ni a ti bawk.
CPI MP Binoy Viswam chuan ‘crime’ ti hiala sawiin opposition MP-te chuan session neih mekah au chhuahpui ngei an tum thu an sawi a ni.
MP te constitution copy pekah inhnialna
