Lok Sabha member atana inthlanpui awm turah Mizorama seat khat awm inchuh tura nomination thehlut mi paruk chuan endikna an paltlang vek a. Campaign leh a kaihhnawihah cheng nuai 95 thleng an hmang thei ang.1-Mizoram (ST) Parliamentary constituency-a candidate tur leh an aiawhte hi Ningani khan returning officer Nazuk Kumar hoin nomination endik (scrutiny of nominations) a ni a, pawm vek an ni. Endikna hi general observer Dr Nipun Vinayak chuan a telpui.
Ningani vek khan Lok Sabha inthlanpui 2024 atana Mizorama expenditure observer Arvind Sharma chuan candidate-te sum viltu expenditure agent-te kawmin, candidate-te campaign-na atana sum dah chu dik leh langtlang taka chhinchhiaha vawng turin a chah a. Election Expenditure Monitoring asst. nodal officer Lalhruaizela Fanai chuan sum vawn dan hrang hrang a zirtir a ni.
Expenditure observer chuan tun inthlanpuiah hian Mizorama MP candidate-te sum hman theih chin, cheng nuai 95 chu an hmanna uluk leh dik taka chhinchhiah a pawimawh tih a sawi a. A theih chen chenah political party/ candidate tu tan pawh angkhata inelna hmun siam a nih theih nan he expenditure limit hi siam a ni, tiin, voter-ten anmahni duh ngei vote thei loa sum leh therlo hmanga an duhthlanna tihbuai sak an nih loh nan expenditure monitoring a pawimawh tih a sawi.
Election Commission of India-in sum vil leh endik danah inkaihhruaina uluk tak siamin, thil thup leh dan kalha thil tih awm hmuhchhuah a nih chuan ECI-in na takin hma a la thei tih a sawi. Chutihrualin, expenditure agent zingah hriatthiam loh leh harsatna nei tan observer leh Expenditure Monitoring nodal officer-te leh Accounting Team chu engtik lai pawhin anmahni pui turin an inhawng reng tih a hrilh a ni.
Candidate tura tlinga pawm ho
Recognised/ national & state party:
Lalbiakzama – Indian National Congress
Richard Vanlalhmangaiha – Zoram People’s Movement
Vanlalhmuaka – Bharatya Janata Party
K Vanlalvena – Mizo National Front
Registered political party candidate:
Rita Malsawmi – People’s Conference
Independent candidate :
Lalhriatrenga Chhangte – Independent