Mizoram People Forum a din hnuah tun term inthlan kan hmachhawn mek hi MPF leh political party hrang hrangten thawhhona thuthlung nei chunga inthlan hmachhawn \um lina a lo ni ve leh ta reng mai a. MPF hi kum 2006 June ni 21-ah din niin 2008 inthlanpui a\angin political party-te nen thawhhona hnuaiah election hmachhawn \an a ni a. Hetia MPF leh political party-te thawhhona hnuaia inthlan neih a nih tak chinah hian, tunhmaa inthlan boruak sa hulh hulh ang kha awm tawh lovin, boruak muanawm tak hnuaiah inthlanna hi neih \hin a ni, a tih theih awm e. Mizoramin inthlan kan hmachhawn dan hi state dangte pawhin \ha an tih hle rualin, anni chuan an la kalpui ve thei lo.
Tun \umah pawh hian political party hrang hrangte leh MPF te hian inthlan hmachhawnna turah tihtur leh tih loh turte zamin party aiawhten hming ziak meuhvin thawhhona thuthlung an siam a. Thawhhona thuthlung ang diak diaka zaa za (100%) hlawhtling chiah lo mah se, 100% a tlinlohnate hi inthlan boruak hmelhmang tichhe vek khawpa pawi thui lutuk a ni hran lo niin a lang.
Tunhma, MPF a la pian hma kha chuan, political party tinin thawm lian tak neih an tum vek a, banner leh flag lamah inelna a awm a, ruai\heh leh kawngzawh, khawlaia aurinna nena campaign, in tin luhchhuaha sum leh pai leh therhlo eng eng emaw hmanga campaign te kha kalphung pangngai kha a ni tawh mai a. A thlangtu mipui lam pawhin ram inrelbawlna thilah ril tak ngaihtuahna seng lem lovin, a thawm na na, a au ring ring kha chak tura ngaiin, ‘tunge vote ila \ha ang?’ tih aiin, ‘eng party nge chak ang?’ tiin chak tura rin lam kha vote mai tur emaw ti tlat kha an la tam em em a. Chu rilru sukthlek (mindset) chu hre ranin political party tin khan election campaign kha an kalpui ta chiam mai \hin a ni.
Tunah chuan mipui rilru sukthlek pawh a lo danglam ve tial tial a, chhia leh \ha hriatna thiang tak hmangin election an hmachhawn thiam tawh. Party ten a huau huau zawnga boruak an siam chiam pawh hian awmzia a nei tak tak tawh lo va, insensona awmze nei lem lo a ni thei tawh. Hetianga thawhhona thuthlung zah taka inthlan hmachhawn hi kan vaia \hat tlanna tur a ni tihah hian kan lungrual tlan a pawimawh a ni e.
MPF leh party thawhhona
