Tunlaiin khawvel hmun thenkhatah mpox a leng a, he hrileng hi a darh telh telh bawk. Mizoram chu a la him a, thuneitu lamin chi-aina tur a awm rih lovah an ngai.
Integrated Disease Surveillance Programme (IDSP) hotute’n Mizoramah he natna hi hmuh a la nih loh thu an sawi a, state nodal officer Dr Vanlalrengpuia Chinzah chuan Mizoramah he natna hmuh a nih rih loh bakah rinhlelhawm pawh an la awm loh thu a sawi.
India sorkarin he hrileng laka inven dan tur a duan thu a sawi a, Mizoram pawh chumi anga a kal tur thu leh tunah pawh a theih ang angin hmalak reng a nih thu a sawi.
India ramah he natna vei hi an la awm lovah ngaih a ni a, mahse international airport leh seaport-ahte chuan khualzinte endik an ni.
Dr Rengpuia chuan National Institute of Virology, Pune lamin nikumah daih tawh khan ZMC chu sentinel surveillance centre atan a ruat tawh thu leh ZMC lam hian thil tul leh pawimawh chu an bawhzui reng thu te a sawi a, thlithlai tura tih thenkhat chu mipui hriat lohvin an lo thlithlai reng tawh thu te a sawi bawk.
Mizoramah he natna kai leh kai loh endikna khawl pahnih, ZMC-ah leh Lunglei Civil Hospital-ah te a awm thu a sawi a, rinhlelh an awm chuan endik zung zung theih a nih thu a sawi bawk.
Mpox hi Africa khawmualpuiah hmuh a ni a, tun hnaiah khawmualpui dangah hmuh a ni. Khawmualpui danga hmuhte pawh hi tun hnaia Africa-a zin an ni hlawm.
Dr Rengpuia chuan he hri hi 2022-ah India ramah hmuh a lo nih tawh thu leh, enkawl dam vek an nih thu a sawi.
Mpox vanga chiaina tur awm rih lovah ngai
