Mizoram Rural Bank chairman thar Sheryl L Vanchhong chuan Ningani khan chief minister Zoramthanga a hmu a. MRB hmalakna leh ruahmanna an neihte hrilhin, mipuiin tangkai zawka an bank an hman theih dan tur an sawi dun.
Tunhnaiah chief minister-in recapitalisation lama an harsatna a sutkian sak avangin MRB hotu hian lawmthu a hrilh a. MRB chu India hmarchhak huapa rural bank lian ber, tunhnai maia NABARD pawhin Best Regional Rural Bank-a a thlan an ni tih sawiin, annual capital turn over pawh cheng vaibelchhe 4880 chuang a tlin thu a sawi a ni.
Chief minister chuan Mizoram Rural Bank chu an inzarpharh that avang leh an hnathawh that avangin mipui hriat an hlawh a, khawvel changkang zelah mitinin bank nena inthlunzawm kan mamawh vek tawh avangin chumi kawngah chuan MRB-in hna a thawk tha hle tih a sawi. Hma an sawn zel theihna tura sawrkar lama mamawh an neihte thlen zel thin turin a chah.
Mizoram Rural Bank hian branch 102 neiin thawktu nghet 475 an awm a, thingtlang hmun kilkhawr zawk amite tan mini ATM 270 a nei mek a, a dang 75 neih belh tumin hma a la mek. Financial inclusion lama hmalaknaah khawtina self help group-te nen an thawk ho tha hle niin an sawi a ni.
MRB hotu in CM lawmthu hrilh
