- Home minister
MRHG&CD hna lak dan leh an
dinhmun felfai zawka siam a tul
- Home minister
Mizoram Home Guards & Civil Defence (MRHG&CD) hotute chu Zirtawpni khan anmahni hmunpui Chawlhhmunah thukhawmin hma an lakna leh an hnathawh an thlirlet.
Hmanpuitu Home minister K Sapdanga chuan MRHG&CD-a volunteer-te chu ram leh mipui tana hna pawimawh tak thawktu an ni tih sawiin, sawrkar hmun pawimawh vengtu, khuarel chhiat nikhuaa chhanchhuah leh chhawmdawl hna thawktu an nih bakah dan leh thupek kenkawh kawnga police tanpuitu an ni tih a sawi.
MRHG&CD dinhmun chawisan a nih theihnan leh politics inrawlh lo (political appointment) a hna lak a nih theihnan hna lak dan (recruitment system) felfai zawk siam a tul tih sawiin, “Volunteer hna dilte tan hna dilna standard form siama open advertisement tih chhuah nise, educational qualification pawh tihsan ni thei se,” a ti.
MRHG&CD volunteer-te retirement benefit nei loa an awm reng chu veiawm a tih thu Home minister hian a sawi a. Mizoram Provisional Employee Savings Scheme 2024-ah an tel theih dan ngaihtuah a tul tih a sawi.
MRHG&CD-a volunteer-te chu ral do tura ngaih ni lo mah se, ralthuam pek an ni a, a tul chuan ral do tura inring tur an ni, tiin, mi tha leh rintlak ngei laka tuaihriam leh training tha tak pek an ngai tih a sawi a ni.
MRHG&CD commandant general cum director Major Zosangliana Hualngo chuan presentation pein, MRHG&CD inrelbawlna leh thawktute service, CTI Sesawnga Training Centre tih changtlun dan leh hmachhawp dang sawiho a ni.