Mizoram State Commission for Women chairperson hna a zawm dawnin kum 1960-a piang anga Birth certificate a thehlut tih a chian hnu ah Birth certificate lem siam nia hria in chairperson Lalchhandami lakah FIR an thehlut tih MNF party chuan an sawi.
Zirtawpni khan Bawngkawn Police Station-ah FIR hi an thehlut tih sawiin, ‘Pi C Lalchhandami hi Mizoram sawrkar AH & Vety department hnuaiah research officer atangin 31.03.2016 khan a pension tawh a. Hemi atanga chhut hian kumin March-a MSCW chairperson atana ruat a nih khan chairperson ni tura MSCW Rules-in kum bithliah a tarlan, kum 65 a pel tawh ngei tih a chiang tih a sawi.
Social Welfare minister Pi Lalrinpuii’n Pi C Lalchhandami hi chairperson-a ruat a nih dawnin, kum 1960-a piang a ni tih tarlanna Birth certificate a thehluh thu thuthar thehdarhtute hmaah a sawi tih sawi bawkin, ‘Hetianga Social Welfare minister berin Pi C Lalchhandami’n kum 1960-a piang a ni tih tarlanna Birth certificate sawrkara a thehluh thu a sawi lehzel takah chuan, Birth certificate lem a siamtir ni ngeiin a lang ta a, document lem (forged document) hmanga sawrkar bumna lian tak ni ngeia a lan avangin BNS 2023 Section 336, 337 leh 339 tlawhchhanin Birth certificate lem siam chungchang hi chhuichiang tur leh dan bawhchhiatna hi chhuichhuak a, thilsual titute dan hnuaia hrema hma la turin police kan ngen a ni,’ MNF thuchhuah chuan a ti.
MSCW chairperson lakah FIR thehlut
