MSL 11 – Semi Finals lut a chiang ta!
BCA, TBL, ZBBC leh Hotshots
Mizoram Super League (MSL) 11 chu Hawla Indoor Stadium, Republic Vengthlangah khelh chhunzawm zel a ni. March ni 17 tlai dar 5:30 khan semi finals an luh nana chak mamawh Zemabawk BC (Zbbc) chuan beisei pha lo Chhinga Veng BC an hmachhawn a, 99 – 73 in an chak a, semi finals an lut.
ZBBC hian an match hmasa pathumah Zarkawt BCA, Mission Veng Hotshots leh Khatla TBL an hneh lo nghal thawt vek – beisei an pha lo!
An player inhliam leh coaching staff lamin an player-te an rem fuh tawk loh a kawh ngam an chak loh chhanah hian; mahse, an match hnuhnung pali-ah erawh hnehna chang fai vekin, big 4 club zinga chhal ngam Chanmari BC chu point 30 zetin an sawp thei – ZBBC hian MSL X ang bawkin tum thum chak loh zet hnuah semi finals an in theh kai leh tlat.
ZBBC hi an insawhnghet sauh sauh a. MSL 11 ah hian supporter nei tha bera chhal ngam an ni rih – an thahrui a chauh a, thapui chhuah hlei thei lo va an awm lai leh an chak loh nawn awn awn karah thlawptu tha, ‘ZBBC Hardcore Fans’ hian entir a nei – Zemabawk veng hi an inlungrual takzet a, an veng hmingthatna tur kawngah an khawtlang hruaituten inkhel en in, Hawla Indoor Stadium an mawi thei reng hi chhinchhiahtlak chungchuang a ni. Veng fai hi MSL 11 champion veng ni zui thei tak maw…
Nimin tlaia inkhelah hian ZBBC star player Ropuia chu player of the match atan thlan a ni a, ani hian Israel Cafe leh MYC atangin memento leh lehkhabu a dawng – point 28 neiin, assist 6 leh steal 4 a nei tel thei cheu. An match hnuhnung pahniha player of the match ni thei Thianga pawhin point 19 a nei cheu.
Inkhel hnuhnung zawka Mission Veng Hotshots leh Khatla TBL inkhel hian Zemabawk BC an chak tak avangin awmzia a nei thui tawh lo va, an inkhelh tan hma hauh atangin semi finals lut hi a chiang sa a ni.
Zanina inkhel tur hian hmahruaitu tur a nemnghet ang. Tuikual South hi tla (relegate) tura ngaih theih an ni a, Saron BC leh Chanmari BC hian table-a pangana nih an inchuh ang a, a chak lo zawkin relegation battle-ah Chhinga Veng BC an tum ang.
Zanina inkhel turte:
Zarkawt BC Vs Tuikual South – 5:30 pm
Saron BC Vs Chanmari BC – 8:30 pm