February 4, Zirtawp zan khan Mizoram Basketball Association (MBBA) Division 1 leh Division 2 Screening Tournament final khelh a ni a. Nursery SC leh VR4 te Mizoram Super League (MSL) khel turin an tling a. Division 1-ah Saron BC leh Zemabawk BC te an kaisang ve bawk.
Zirtawp zana Division 1 final ah Nursery SC in VR4 lakah bul an tan tha a, quarter hmasa pathumah chungnung zawkah an tang vek. Point 15 zeta hmahruai chunga chawlhlawk hmang NSC hi third quarter-ah point 8 zetin chungnung zawkah an tang zui leh cheu. Quarter hnuhnung berah point 21 ve ve thawkchhuakin, inhnehtawk bawk mah se NSC hian point 23 zetin an khingpui VR4 an hneh zui ta tho a, phu takin an champion. Division 1 final-a intum Nursery SC leh VR4 te hi Mizorama inelna lian ber Mizoram Super League (MSL) khel turin an tling ve ve a, season tharah inelna lian an hmachhawn thei dawn.
Division 2 final-ah Zemabawk BC leh Saron BC ten inkhel hmuhnawm an lantir a, champion tumin an inlehthal zak zak. Zemabawk BC hian quarter hmasa berah bul an tan chhiat an tuar a, point 19 zeta hnufual zawk an nih nghal vangin an khingpuite an lehthal zo tawh lo. Quarter hnihnaah Zemabawk BC an insiamtha a, point sarihin chungnung zawkah an tang ve ta thung. Quarter hnihnaah hnufual zawk ni bawk mahse point 12 a hmahruai chungin Saron BC in chawlhlawk an hmang.
Point 12-a hmahruai tawh Saron BC hian chawlhlawk hnu lamah an khel tha chhunzawm a, quarter thumnaah point 10 zeta an chungnung hnuin, quarter hnuhnung berah point hnihin an chungnung zui leh hram a. Point belhkhawmah 86-62-a chakin an champion zui ta a ni. Division 2 final-a intum Zemabawk BC leh Saron BC te hi season thar atangin Division 1-a inlan turin an kaisang ve ve.